Oslo Børs på rekordnivå

Hovudindeksen på Oslo Børs enda på 1584.

I løpet av dagen var børsen over 1590. Det er høgste nivå nokosinne.

Kursen står i sterk kontrast til då børsen stupte i april.

– Det har vore ein veldig solid utvikling. Vi er opp hyggelege 16,5 prosent sidan botnen 9. april, seier investeringsdirektør i Nordea Robert Næss.

Han seier det har vore meir optimisme i aksjemarknadane i det siste, samstundes som det er mindre frykt for at Noreg skal bli hardt råka av tollbarrierar.

Også porteføljeforvaltar i Storebrand, Olav Chen, meiner at folk ikkje trur Donald Trump vil gjennomføre det han har trua med.

– Det er mindre frykt for ein kraftig økonomisk nedtur som følgje av handelskrig. Det er det som har blitt kalla TACO-effekten, altså «Trump Always Chickens Out», seier Chen.

Flat oljepris

Oslo Børs heng ofte saman med prisen på olje, men i det siste har ikkje den hatt same opptur.

Sidan nyttår er Oslo Børs opp over 11 prosent. I same periode har Oljeprisen gått ned med over 12 prosent.

Analytikar Ole Hvalbye i SEB seier det framleis er mykje usikkerheit i energimarknaden.

– Etter at Trump lanserte toll i april såg vi nedgang i nesten alle marknader. Prisane på olje og gass tryna ned med over 15 prosent. Det som ligg bak er at mønster for handel i verda er forstyrra og då blir det mindre behov for energi, seier Hvalbye.

– Det er ganske spesielt. Equinor og andre oljeselskap utgjer ein stor del av totalverdien på børsen, så det heng ofte tett saman, men no ser vi eit større avvik frå den trenden, seier Chen.

– Det er uvanleg at går marknaden i Noreg sterkare enn i USA trass i fall i oljepris, seier Næss.

Han peikar på at mykje av oppgangen på børsen kjem frå selskap utanfor oljesektoren og trekker fram til dømes Kongsberg Gruppen og DNB.

Chen meiner mykje av det som driv børsen opp er pengar som blir flytta på USA til Europa.

– Vi ser at dollar har svekka seg. Samstundes har børsane i Noreg, Sverige, Tyskland og fleire andre stader i Europa har gått som ei kule, seier Chen.

– Ikkje nødvendigvis slutt på kaoset

Trass ein periode med svær vekst vil ingen av økonomane avblåse børsuroen.

– Det er alt for tidleg å seie. Det er framleis veldig usikkert kva Trump vil gjere. Dersom det blir dei tollsatsane som han no har utsett, så kan vi få ein nedgang i verdsøkonomien og resesjon, seier Næss.

– Det er ikkje nødvendigvis slutt på tollkaoset, men marknadane har pusta letta ut inntil vidare, seier Chen.

Då børsane stupte i april var ei rekke økonomar på banen og råda folk om å sitte stille i båten.

– Kva er rådet ditt no?

– Haha, generelt så skal du sitte stille. Dersom du sparar langsiktig i aksjar så skal du berre halde på dei og ikkje bruke dei før du skulle trenge pengane. Det treng ikkje vere lurt å selje no, for nye «all time high» får vi normalt kvart år, seier Næss.

– Vi sat ikkje berre stille. Vi kjøpte mykje aksjar i dei turbulente vekene i april og brukte det mandatet vi har for å gå meir inn i aksjar. Det vi kjøpte då sit vi framleis på, seier Chen.

– Er du fornøgd med den avgjerda?

– Ja, det må eg seie. Det trur eg kundane mine også er, seier Chen med eit smil.