Opposisjonen om budsjettforhandlingane: – Totalt kaos

– Det er totalt kaos. Det var dette vi åtvara mot i valkampen.

Det seier Sylvi Listhaug leiar i Framstegspartiet, etter at MDG og SV laurdag valde å forlate statsbudsjettforhandlingane.

Meiner Arbeidarpartiet sviktar valkampløftet

Listhaug meiner Arbeidarpartiet har svikta sitt eige kjernebodskap frå valkampen.

– Eg synest det er rart at Stoltenberg og Støre, som reiste valkampen og snakka om tryggleik for landet vårt, trygg styring, har kasta landet ut i kaos, seier ho.

Også Nikolai Astrup (H) meiner at Støre ikkje har klart å innfri lovnaden om trygg styring til veljarane sine.

– Akkurat nå har vi fått det stikk motsette.

Laurdag la regjeringa fram eit nytt budsjettforslag saman med Sp og Raudt, men utan fleirtal i Stortinget.

Listhaug viser til at veljarane valde eit fleirtal på venstresida.

To parti trakk seg

I sitt budsjettforslag auka Arbeidarpartiet prisane på bensin og diesel.

Etter det NRK får opplyst fekk Senterpartiet fjerna denne auka i forhandlingane, noko MDG ikkje ville godta.

– Til slutt går det ei grense for kva vi kan vere med på. Den grensa nådde vi, sa Arild Hermstad, leiar i MDG laurdag etter at dei forlèt forhandlingane.

Han ville ikkje gå konkret inn på kva dei var ueinige med regjeringa om.

Også SV som har vore budsjettpartnar til Ap sidan dei kom i regjering i 2021, gav opp samtalene.

– Dette er den absolutt mest rotete budsjettrunden, sa Kirsti Bergstø under laurdagens pressekonferanse.

Ho ville likevel ikkje utelukke eit samarbeid.

Eit parti som ville samarbeide er Raudt, dei har fått gjennomslag for fleire velferdstiltak.

Astrup meiner avtalen som no ligg på bordet, manglar legitimitet.

– Det som blei presentert i går, er ikkje verdt papiret den er skrevet på, fordi den har ikkje fleirtal.

– Nå er det viktig at statsministeren tar ansvar for denne situasjonen og bidrar til å sikre landet et budsjett, men akkurat nå er det ingen utsikter til fleirtal, legg Astrup til.

Høgre: – Vi klarte gjennom åtte år

Listhaug sat sjølv i regjering frå 2015 til 2019.

Ho seier at budsjettforhandlingar alltid er vanskelege, men meiner at årets prosess skil seg ut.

– I motsetning til før, då ein kunne forhandle heilt til ein kom inn i stortingssalen og legge fram lause forslag, er dei moglegheitene borte. No må ein halde fristane, og det ser ein ikkje ut til å ha greidd i dette tilfellet, seier ho.

Ho meiner partia må klare å tilpasse seg nye reglar.

– Viss det er nye tidsfristar og nye reglar, så må ein jo tilpasse seg dei. Og det ser det ikkje ut til at ein har greidd i dette tilfellet, seier Listhaug.

– Høgre-regjeringa opplevde også brot i budsjettforhandlingar?

– Det er alltid vanskeleg å få fleire parti til å bli einige, men vi klarte gjennom åtte år, svarer Astrup.

Vil ikkje redde regjeringa om det blir krise

Budsjettet skal bli stemt over neste fredag.

Viss statsminister Jonas Gahr Støre (Ap) ikkje klarer å samle fleirtal, kan eit moglege utfall vere at han stiller kabinettspørsmål i Stortinget for å få SV og MDG med på budsjettet.

På spørsmål om Frp vil frede regjeringa ved eit slikt tilfelle, er Listhaug klar.

– Frp kjem aldri til å stemme for budsjettet til Arbeidarpartiet.

Ho utdjupar:

– Vi kjem til å stemme for vårt eige, som er å setje ned skattar og avgifter, stoppe sløsinga og prioritere kjerneoppgåvene i Noreg, seier ho.

Astrup vil ikkje spekulere i korleis Høgre vil stemme.

– Det er altfor tidleg å seie kva som skjer på fredag. Det er lenge til i politikkens verda.

Han er tydeleg på at det er statsministerens ansvar å lande eit budsjett.

Kallar prosessen for kaotisk

Listhaug meiner dagens situasjon var føreseieleg.

– Eg åtvara mot det i valkampen også. Eg kalla det for kaoskameratane. Det var nokon som blei litt sure då.

Astrup er einig.

– Det er pinleg, fyrst og fremst for Arbeidarpartiet. Det er det komplette kaos som vi har vore vitne til nå dei siste dagane, og fristane spring.

Listhaug meiner manglande samling på venstresida no blir tydeleg.

– Når du har fem parti med så mange ulike meiningar, blir det vanskeleg å foreine det. Og det er det vi ser no. Det er ikkje trygg styring, men kaos, seier ho.