Opnar opp om betent forhold – Sundby angrar på Northug-tirade

– Slå deg ned!

Petter Northug ønsker Martin Johnsrud Sundby velkommen ned i sofaen i eiga smørjebu. Under det eksklusive møtet med NRK smiler og ler dei to skilegendene om kvarandre.

Men om vi skrur klokka nokre år tilbake i tid, var stemninga ein heilt annan.

NM på Gåsbu, 2013: «Johnsrud Sundby langar ut mot Northug» var overskrifta hos NRK etter tremila. NRKs nåverande langrennsekspert var forbanna over at rivalen nekta å bidra i front gjennom løpet.

– Eg synest det er dritirriterande, sa Sundby og kalla Northug «feig».

Det var gnissingar mellom dei norske skistjernene, og på pressekonferansen etter rennet var det ei pinleg stemning mellom dei. Northug unnskylda seg med at han ikkje var i god nok form til å dra, og står på sitt den dag i dag.

– Det gjekk jo styggfort!

Latteren sit laust når dei ser TV-reportasjen frå rennet. Samtidig gremmast dei litt, i alle fall Sundby.

– Det er jævlig å sjå. Det har vore mitt store problem heile karrieren; eg klarer ikkje å skjule nokon ting. Det kan Petter bekrefte òg.

Sidemannen nikkar bekreftande.

– Dette var eit kjent ansikt for meg, så eg tok det nok betre enn folket her. For meg var dette eit heilt daglegdags syn, ettersom vi var på lag på denne tida, seier Northug.

Slik såg det ut i NM i 2013:

– Ingen i Trøndelag har sett på meg

Ærlegdom var lengst, men var det så lurt å gi Northug det glatte lag? Ikkje nødvendigvis, ifølge Sundby, som beklaga utblåsinga i media året etter.

– Eg gjorde det sjakktrekket at eg gjekk i strupen på Noregs desidert mest populære utøvar nokosinne. Det var kjempesmart! Det er ingen i Trøndelag som har sett på meg sidan 2013.

– Du blir jo rassholet, seier han om responsen.

Dei to tidlegare kamphanane meiner likevel at det var takhøgd på landslaget i denne perioden. Feiden som kom ut i offentlegheita, var berre ei forlenging av tonen som var på samlingar året rundt.

– Den gnissinga vi ser her, ho var bra for begge. Men frå utsida, er det litt kulturkrasj. For fanskaren min er så brutal, at om dei kjenner på motstand så angrip dei. Den interessa var bra på den tida. Sånn var langrenn før, meiner Northug.

Han og Sundby var like i at dei gjorde alt for å bli best. Andre sider av dei var heilt ulike, men også med på å gjere begge enda betre.

– Kulturkrasjen er kven ein er som personlegdommar. Og eg kan med handa på hjartet si at eg aldri ville blitt ein god skiløpar utan han på laget. Og så trur eg – eg er såpass høg på meg sjølv – at han blei dratt litt opp på listene av å ha ein Røa-gut på samling, fortel Sundby.

– Det blei trena så knallhardt at eg grudde meg. Det nivået og trykket som var da, det var ein treningskultur som gjorde at vi la ned ein brutal innsats. Det gjorde meg fokusert og Martin til ein av dei beste skiløparane i verda nokre år, supplerer Northug.

Klar oppfordring til dagens løparar

Sundby merka at Northug-fansen mislikte han, men avviser at forholdet var så ille som nokon skulle ha det til.

– Dei trur oppriktig at det er to gutar som hatar kvarandre, og det er fascinerande.

Men rivalar var dei. Og klare beskjedar blei gitt. Både Northug og Sundby saknar temperatur blant utøvarane i dag.

– Ja, eg saknar litt meir intrigar, meir tydelege meiningar. Det er mykje klapp på skuldra. Eg skulle gjerne sett at det var meir oppgjer internt, sånn som før.

– Det er det nok i dag òg, men eg synest det er litt meir varsam. Sånn har det dessverre blitt, og det vil igjen gå ut over interessa, seier Northug.

Han meiner at Johannes Høsflot Klæbo og Harald Østberg Amundsen er dagens svar på Northug og Sundby, men at det «framleis ikkje er i nærleiken».

Dei siste åra har det blitt slått alarm om interessa for langrenn, både i Noreg og internasjonalt. Lågare sjåartal, mindre engasjement og fallande sponsorinntekter har blitt ein gjengangar i media.

– Eg er heilt einig med Petter. Og spesielt etter karrieren blir ein klar over det å skape underhaldningsverdi og kjensler. Eg godtok på eit eller anna vis at «OK, da blir eg hata», men det er i alle fall nokon som kjenner noko. Det er nokon som følger med og tenker at «han vil vi i alle fall ikkje at skal vinne», seier Sundby.

• Søndag er det siste dag av NM del 1, med stafett for både kvinner og menn. Det kan du følge på NRK frå 11.15.