Omstridd Max Manus-statue blir flytta

I 14 år har statuen av Max Manus skoda ned mot staden der Manus gjennomførte sin mest vellykka sabotasjeaksjon.

No skal statuen flyttast frå Akershus festning.

Ei av årsaka til flyttinga er at statuen står plassert på ein stad som ikkje er godt nok synleg for publikum.

Det er foreløpig ikkje avgjort kor statuen av krigshelten hamnar.

– Vi er veldig spent på kva dei landar på.

Det seier dottera til Max Manus, Mette Manus, til NRK.

Det er foreslått to plasseringar for statuen. Langkaia framfor Havnelageret og Kongsbakkeallmenningen i Bjørvika.

Begge har utsikt mot Oslofjorden, der motstandsmannen opererte under krigen.

Det var Forsvarets Forum som omtalte saka først.

Mette Manus synest begge forslaga til plassering er svært gode alternativ. Det viktigaste er at han får ein verdig plass, seier ho.

– Og at han er knytt til der det var aksjonar. Det er fint om han står på ein historisk plass.

Omstridd statue

At statuen til slutt enda opp på Akershus festning i 2011, er ikkje tilfeldig.

Først var planen at statuen skulle stå på Aker Brygge, men då sette krigsheltane Sverre Kokkin og Leif Kjemperud frå Pelle-gruppa foten ned.

– Det høyrer ingen stad heime å plassere ein statue av Max Manus på Aker Brygge. Han var ikkje med på sabotasjeaksjonane her.

Det sa Kokkin og Kjemperud til NRK før statuen vart plassert i 2011.

Kjemperud meinte at ein statue av Max Manus på Aker Brygge ville vere ei historisk løgn.

I 2013 fekk Pelle-gruppa sjølv eit monument på Aker Brygge.

Etter mykje bråk hamna statuen av Manus på Akershus festning. Mette Manus ser tilbake på oppstyret rundt den første plasseringa som uheldig.

– Heldigvis blei det rodd fint i land, men det var ein ubehageleg prosess, seier Manus.

Lite hensiktsmessig plassering

Det er Forsvarets Fellestenester og Oslo Havn KF som har fått i oppdrag å finne ei ny plassering av statuen.

Avdelingssjef i FFT, Christopher Carlsen, seier til Forsvarets Forum at dei saman med kommunen vil bruke tida det tar for å finne ei god, permanent plassering.