«Ølhunden Berit» vinn pris for beste serie

I «Ølhunden Berit» møter vi Tom. Han er ein smart, men sint og frustrert kvinnehatar.

Han oppdagar at verda opnar seg for han, når han blir tvinga til å ikle seg kvinneklede.

I kveld vann serien pris i kategorien «Best Series Award» på filmfestivalen Serielizados i Barcelona.

Tidlegare har han vunne prisar i Canneseries.

– Vi er utruleg glade og takksame for at «Ølhunden Berit» blir så godt mottatt ute i verda.

– Det mest spennande er likevel mottakinga her heime, men ein sånn pris roar nervane litt, seier serieskapar Thomas Seeberg Torjussen.

I serien speler Anders Baasmo hovudrolla.

– Det er alltid givande å jobbe med gode og originale kvalitetsmanus med brodd, som har noko på hjartet og mykje å melde rundt menneske og samfunn, har Baasmo sagt til NRK.

I serien er Toms største hatobjekt feministar, og spesielt rammar dei stygge kommentarane hans den kjente og folkekjære standupkomikaren Live Stensvaag.

Når trakasseringa får Live til å bryte saman på scena, deler ho kommentarane til Tom offentleg. Dette får indignerte hackarar til å avsløre identiteten hans og brette han ut i all offentlegheit.

– «Ølhunden Berit» opplevdes sterkt meiningsfullt å gjere, seier Baasmo.

NRK er også fornøgd med prisane.

– Det seier noko om kva kraft og kvalitet det er i norsk drama, seier Marianne Furevold-buland, redaksjonssjef drama i NRK.

– At «Ølhunden Berit» og Thomas Seeberg Torjussen igjen vinn ein gjæv internasjonal pris, viser kva for ein unik og formidabel dramaserie dette er.