Nye svindelforsøk: Ber deg vitne om falske trafikkulukker

«Vi kontakter deg på vegne av Statens vegvesen angående en trafikkulykke som fant sted i ditt nærområde.»

Slik startar e-posten som Statens vegvesen no åtvarar om.

Desse e-postane ber nemleg om informasjon som kan bli brukt til ID-tjuveri.

Statens vegvesen vart klar over svindelforsøka natt til onsdag denne veka, etter tips frå kundar.

Ser profesjonelt ut

Gjermund Skotten i Krimenheten til Statens vegvesen seier at dei førebels har fått inn 35 meldingar frå kundar som har fått denne e-posten, men at talet truleg kjem til å auke.

Den aktuelle e-posten kallar inn folk som vitne i ei trafikkulukke som skal ha skjedd i mottakar sitt nærområde, og inviterer deretter vedkomande til å få meir informasjon ved å klikke på ei lenkje.

– Der blir du beden om å oppgi informasjon som kan bli brukt til ID-tjuveri, fortel Skotten.

Han er ikkje kjend med at nokon har blitt svindla.

– Men vi har fått beskjed om at nokon har klikka på lenkja. Då seier vi alltid at dei må kontakte banken.

Skotten fortel at Statens vegvesen ofte opplever svindeforsøk.

– Det vi har sett mest av det siste året, har vore utsending av AutoPASS, der folk får beskjed om å betale for falske bompasseringar. I tillegg har vi dei siste månadane sett folk få feilaktig beskjed om at førarkortet er gått ut på dato.

Denne gongen var det likevel litt ekstra spesielt:

– Den her er framstår ganske sofistikert, og vi har hatt stor pågang det siste døgnet, med folk som har fått denne e-posten, seier Skotte.

Dette må du sjå etter

Sjølv om det tilsynelatande kan sjå profesjonelt ut, er det fleire raude flagg ein bør merke seg, fortel Skotte.

– For det første så er ikkje avsendaren vegvesenet. E-posten startar også med «Kjære borger», som er noko spesielt. I tillegg sender vi ikkje ut e-postar der vi ber om slik type informasjon.

– Dette er hovudprioritet for fleire av oss i krimavdelinga. Vi dekkjer alle Statens vegvesen sine område, og det er viktig for oss å vere tilgjengeleg og informere om kva dette er og kva folk skal gjere, seier Skotte.

Statens vegvesen opplyser at dersom du har mottatt ein slik type e-post, eller er usikker på om du har det, kan du ta kontakt med dei via krimtips@vegvesen.no, eller ringe sentralbordet på telefonnummer 22 07 30 00.