Noregs ESC-deltakar endrar kostymet sitt: – Ikkje optimalt

– Litt kult at vi har tenkt litt, seier artisten Kyle Alessandro, som trass i det vil endre på kostymet sitt.

– Nå veit eg ikkje symbolikken bak kostymet til Armenia, men mitt betyr i alle fall mykje for meg personleg da eg kjenner det gir meg ei påminning om mamma og betydninga av låten når eg har det på meg, legg han til.

Det er kjent at artisten Parg skal representere Armenia i Eurovision Song Contest 2025 med låten «Survivor». Men antrekket til artisten er nesten prikk likt som Kyle Alessandros.

– Vi har registrert at Armenia har ein del likskapstrekk med Kyle sin framføring generelt og kostyme spesielt. Det er openbert ikkje optimalt for oss, og er noko vi skal ta tak i, seier MGP-sjef Mads Tørklep.

Noreg stiller i den første semifinalen tysdag 13. mai, og Armenia i den andre semifinalen torsdag 15. mai. Dersom begge blir å sjå i finalen, kan det vere uheldig, ifølgje Tørklep.

Ikkje optimalt

Tørklep seier vidare at det er for tidleg å seie noko om kva som skal skje. Men han har stor tiltru til at det norske teamet tar nokre smarte grep.

– Denne veka går vi i gang med å tilpasse showet til den store Eurovision-scena. Da vil vi definitivt ta dette med oss. Kyle vil og skal skilje seg ut på den største musikkscena i verda. Det kan eg love, seier MGP-sjef Mads Tørklep.

– Eg synest det er ordentleg gøy å jobbe med sceneantrekk, og eg er villig til å endre på antrekket mitt. Men eg ønsker å behalde silhuetten og symbolikken i antrekket eg hadde under MGP, sjølv om det blir ein litt annan vri på det til Eurovision, legg Kyle Alessandro til.

Vidare påpeikar Tørklep at dette ikkje er noko nytt. Og viser til at norske Emmy, som stiller for Irland, har veldig likt antrekk som Væb frå Island.

– Dei har eit større problem enn oss, om eg skal vere ærleg, meiner Tørklep.

Gjer ingen endringar

Emmy Kristine Guttulsrud Kristiansen representerer Irland i Eurovision 2025. Ho synest det er stas at ho har liknande kostyme som Væb og har ingen planar om å endre det.

– Veldig kult å sjå at fleire har gått for sølv i år! Det er ein kjempekul farge, så det er forståeleg, seier Kristiansen.

– Vi valde sølv for at det skulle minne om astronautdrakter. Sølv og gull er jo populære festfargar, så det er ikkje rart at det blir litt av det i den største musikkfesten i verda, legg ho til.