Nordmenns grillfavorittar rammes av nytt EU-forbod

Røykaroma blir tilsett matvarer som kjøtt, fisk eller ost, og er eit alternativ til den tradisjonelle røykeprosessen.

Tidlegare har røykaroma blitt sett på som tryggare enn å røyke maten, men dette ser ut til å ha vore ei sanning med modifikasjonar.

Det er frykt for kreft som er grunnen til forbodet, ifølge seniorrådgivar i seksjon for kjemisk mattryggleik i Mattilsynet, Ellen Kielland,

– Risikovurdering frå EFSA konkluderte med at røykaromaene inneheld stoff som kan vere gentoksiske. Det vil seie at dei kan forårsake kreft hos menneske ved å skade arvematerialet, forklarar ho.

På same tid understrekar ho at røykaroma blir tilsett i små mengder, og vi får i oss lite av desse stoffa.

Likevel blir det eit forbod, som går utover fleire matfavorittar.

Må endre skinkeost og grillpølser

Røykaroma finst i ei rekke matvarer, blant dei vanlegaste er pølser, bacon, og skinke.

Røykaroma er også brukt for å gi røykt smak på produkt som paprika, supper, sausar, drikke og chips. Det gir også farge på yttersida av produktet ifølge Kielland.

– Røykaroma er eit produkt som er framstilt ved reinsing, fraksjonering og kondensering av røyk, og der oske, tjære og kvae er fjerna. Røykaroma kan brukast i eit røykekammer eller røykerom, forklarar ho.

Etter ein rask titt i butikken, kan ein sjå at mellom anna grillpølser og Kavli sin skinkeost inneheld slik røykaroma.

– Vi er i gang med å sjå på alternative produksjonsmetodar, seier senior kommunikasjonsrådgivar i Nortura, Marthine Haugan Petersen.

Dei nyttar i dag røykaroma i produkt som pølser, bacon og enkelte pålegg.

– Røykaroma har lenge vore rekna for å vere den mest helsevennlege teknologien for å få røyksmak på produkta, men vi vil sjølvsagt tilpasse produksjonen vår etter dei nye retningslinjene frå EU.

Vanskeleg å fase ut frå nokre produkt

Kommunikasjonssjef Norgesgruppen, Kine Søyland seier dei allereie har byrja med å fase ut røykaroma i fleire produkt.

– Og har allereie tatt ut røykaroma i enkelte produkt som mellom anna snacks med baconsmak og chilinøtter. Når det gjeld utfasing i kjøttprodukt med røykaroma, så har vi ikkje kome like langt, seier Søyland.

Ho seier dette er vanskeleg fordi det ofte krev nytt utstyr hos produsentane. Tida dei har på å fase ut røykaromaene her er også lengre enn for andre produkt. Det er juni 2029, medan fristen for andre matvarer i 1. juli i år.

– Men desse er også enklare å gjere noko med, for eksempel kan ein byte ut røykaroma med røykt salt.

Dette vil føre til at produkta vil kome på marknaden i to puljar, seier seniorrådgivar i Coop, Knut Lutnæs.

– I og med at det er to ulike overgangstider for å erstatte røykaroma, på bakgrunn av kva metode for tilsetning av røykaroma som blir nytta, vil produkt utan røykaroma komme på marknaden i to puljar.

Han seier dei også er i full gong med å erstatte røykaromaen i Coop sine eigne produkt.

– Målet er å justere produkta slik at kundane våre vil få like gode og velsmakande produkt som i dag.