Nato-toppane skrudde på sjarmen for Trump i Haag

Denne veka er det Nato-toppmøte i Haag.

Både før og under møtet jobbar verdsleiarane med å sjarmere den amerikanske presidenten Donald Trump.

Fleire internasjonale aviser som BBC, The Guardian og France 24 påpeikar at Nato-sjefen Mark Rutte smiskar med Trump.

Like før Trump kom til toppmøtet på tysdag, skreiv Rutte ei privat melding på «Trumpsk-språk» til den amerikanske presidenten.

Mark Rutte fekk posisjonen som generalsekretær i Nato, og tok over for Jens Stoltenberg, med håp om at han var den rette til å halde Donald Trump i varmen til Nato.

Onsdag held Rutte fram med å hylla Trump og kallar den amerikanske presidenten for «daddy», som på norsk betyr pappa.

Under ein pressekonferanse vart Trump spurd om Ruttes «daddy»-kommentar.

– Han liker meg. Om han ikkje gjer, får de vita det. Då kjem eg og slår tilbake. Han gjorde det i affeksjon, seier Trump.

Nato-sjefen sa at USA har fjerna atomkapasiteten til Iran etter angrepet mot tre atomanlegg i landet.

– Det er veldig imponerande, sa han i ein pressekonferanse saman med den amerikanske presidenten.

– Det viser at den amerikanske presidenten kan bruke makt om nødvendig. Det er eit viktig signal til resten av verda, heldt han fram.

Ros for våpenkvileinitiativ

Det er heller ikkje første gong den amerikanske presidenten får skryt av dei andre verdsleiarane.

I helga bestemde Trump seg for å angripa Iran. Tysdag fekk han mykje av æra for å ha landa ei våpenkvile mellom Iran og Israel.

Ein av desse var EU-sjef Ursula von der Leyen. Ho ønskte Trump sitt arbeid med ei våpenkvile, velkommen.

Utanriksminister Espen Barth Eide (Ap) sa at Trump hadde gjort et helt reelt forsøk på å avslutte krigen.

– Det er heilt genuint at Trump dei siste timane og dagane jobba for faktisk å avslutte denne krigen. Det kan høyrest paradoksalt ut, sidan han nettopp var med å bombe Iran. Men etter det har bodskapen vore at no må dette bli ein slutt på, og det trur eg er eit heilt reelt forsøk, sa Eide.

For der er eit paradoks i å rose Trump for å verne om verdsfreden.

Statsminister Jonas Gahr Støre (Ap) har også teke turen til strandbyen Haag. På veg inn til hovudmøtet onsdag blei han også konfrontert med smisketendensane til verdsleiarane før møtet.

– Eg meiner vi må handtere ting mann til kvinne, kvinne til kvinne, kvinne til mann. Vi må vere allierte. Vi behandlar våre allierte som nære venner og partnarar.

Også den svenske statsministeren fekk spørsmål frå journalistar på veg inn til dagens møta om han også hadde rosa Trump då dei møttest til middag i går.

– Nja, eg er ikkje heilt den typen, sa han.

Løkke: Liknar på eit reality-program

Eirik Løkke er rådgjevar i tanketanken Civita og følgjer amerikansk politikk tett.

Han seier at personlege relasjonar i politikken er viktige, spesielt med Trump.

– Det å byggja nære relasjonar gjennom å smiska og fortelja kor fantastisk Trump er, er sånn ein kjem inn på Trump. Dette ser me ikkje berre i Nato, me ser det hjå heile kabinettet til Trump.

Løkke har bite seg merke i at internasjonal politikk liknar meir på eit reality-program enn før.

– Kven får bli? Kven skal ut?

– Mi vurdering er at betydinga av dette er at det kan vere realpolitisk fornuftig å forhalde seg til Trump på denne måten, om ein vil bygge relasjonar mellom USA og Europa og eit transatlantisk fellesskap, seier Løkke

– Dette gjer dei fordi USA er kjempeviktig for europeisk og norsk trygging og ein veit at Trump følger med, seier Løkke.

Han peiker også på at dei som kritiserer Trump får mindre innverknad hjå USA, og difor også internasjonalt.

– Dette er måten ein må forhalde seg til Trump på, om ein vil ha innverknad.

Ruttes strategi

Onsdag gav alle dei 32 Nato-landa tommel opp for det nye 5-prosentmålet (BNP) på Nato-toppmøtet.

Rutte hyllar USAs Donald Trump som avgjerande i å ha fått vedtaket på plass.

– Utan deg hadde det aldri skjedd, konstaterte han på eit pressemøte med Trump.

Ved å smiska og ta i bruk diplomati har Rutte klart å få Trump til å føla at han har vunne, ved å få gjennom ein avtale som ser ut som ein siger for Trump, skriv France 24.

Fordi i praksis er avtalen eit kompromiss:

5-prosentmålet delt i to: 3,5 prosent til reint forsvar og 1,5 prosent til sivil sektor for å styrkja totalforsvaret.

Det har vore uvisse om Nato ville komma styrka ut av denne avtalen, ettersom Trump tidlegare har trua med å droppa støtta til allierte som ikkje betaler nok.

Då USA kritiserte Ukraina, nærma seg Russland og vurderte å trekkja styrkar ut av Europa, vart mange bekymra for framtida til alliansen.

Ruttes strategi har dermed vore enkel: Aldri kritisera eller motseia Trump, skriv avisa.