Minst 19 nye kvinner har meldt Arne Bye til politiet

Etter tre månader i Trøndelag tingrett blei saka mot den tidlegare kommuneoverlegen i Frosta avslutta 19. februar.

Der stod Arne Bye tiltalt for å ha misbrukt stillinga si for å oppnå seksuell omgang med 94 av sine tidlegare pasientar og for å ha valdtatt 87 av dei.

Tysdag stadfestar bistandsadvokatane at minst 19 andre kvinner har meldt Bye til politiet.

– Eg har blitt oppnemnt som bistandsadvokat for elleve, seier Tove Røddesnes til NRK.

Advokat Ingunn Kjelstad fortel at ho er blitt oppnemnt som bistandsadvokat for åtte nye kvinner.

Etterforskar nye saker

I januar blei det kjent at fleire kvinner hadde meldt til politiet Bye etter at saka mot han starta.

Det blei da kjent at 13 nye kvinner hadde fått oppnemnt bistandsadvokat.

Sidan da har fleire meldt Bye til politiet og minst 19 har no fått bistandsadvokat.

– Det blir i disse dagar gjort avhøyr, fortel Røddesnes.

Kjelstad fortel at nokre av hennar nye klientar har blitt avhøyrd, medan andre ikkje enno har vore inne til avhøyr hos politiet.

Arne Bye sine forsvararar har tysdag kveld ikkje svart på NRK sine førespurnader.

Det har heller ikkje påtaleansvarleg for dei nye sakene mot Bye, politiadvokat Ole Andreas Aftret.

Ransaka heimen fredag

Fredag slo politiet til mot Arne Bye sin bustad. Der gjennomførte dei nok ei ransaking av heimen til den tidlegare kommuneoverlegen.

– Vi fekk informasjon i går som verka som at det var mogelege ting som kan ha betydning som bevis, fortalde politiadvokat Aftret til NRK laurdag.

– Det er ting som i seg sjølv eller gjennom at dei inneheld informasjon kan opplyse saka.

Politiadvokaten ønskte ikkje å kommentere kva dei tok beslag i da dei ransaka heimen.

– Vi held fram med å etterforske dei nye politimeldingane på vanleg måte, sa han laurdag.

Bye sjølv blei pågripen berre timar etter at rettssaka mot han blei avslutta i Trøndelag tingrett.

Han sit no varetektsfengsla. Det er venta dom i saka mot han i første halvdel av juni.

Har erkjent å ha valdtatt 21 kvinner

Rettssaka mot Bye gjekk i tingretten mellom 5. november og 19. februar.

I løpet av den over tre månader lange saka erkjente Bye straffskuld for fleire og fleire tiltalepunkt.

Bye har erkjent å ha valdtatt 21 av sine tidlegare pasientar. Han har også erkjent å ha misbruk stillinga si for å oppnå seksuell omgang med 44 av dei.

Aktoratet bad om at Bye skal bli fengsla i 21 år.

Bye sine forsvararar argumenterte på sin side for at riktig straff vil vere mellom 18 og 19 år i fengsel.

Dei fornærma kvinnene sine bistandsadvokatar har i tillegg lagt ned påstand om at Bye må betale over 40 millionar kronar i erstatning.

– Dette er ein spesiell sak på mange måtar. På grunn av omfanget av fornærma, og at den har skaka eit heilt lokalsamfunn, sa Ingunn Kjelstad i sitt avslutningsinnlegg i retten.