Meiner Noreg-laget er avslørt: – Dette hadde eg ikkje trudd

Denne veka har det norske herrelandslaget stengt treningane for pressa for å gjere dei siste førebuingane inn mot den svært viktige VM-kvalifiseringskampen mot Italia på Ullevaal fredag kveld.

Men NRK kan no erfare det som truleg blir Ståle Solbakkens utvalde mot Italia.

To treningar har denne ellevaren blitt drilla:

Ørjan Nyland, Julian Ryerson, Kristoffer Ajer, Torbjørn Heggem, David Møller Wolfe, Sander Berge, Morten Thorsby, Martin Ødegaard, Antonio Nusa, Erling Braut Haaland, Alexander Sørloth.

Østigård blir truleg vraka

Dermed tyder alt på at Leo Østigård (25) blir vraka i midtforsvaret i den svært avgjerande kampen mot Italia.

Østigård, som har spelt 29 landskampar for Noreg, har hatt ein tøff sesong i Hoffenheim, der han dei siste månadene har måtte tole ein del kritikk for prestasjonane.

I staden virker Ståle Solbakken å velje uerfarne Torbjørn Heggem (26) i midtforsvaret, sjølv om West Bromwich-stopparen berre har fem landskampar frå før.

Ståle Solbakken bekrefta også på ein pressekonferanse tidlegare denne veka at han har bestemt seg for kven som blir stopparar.

På pressekonferansen onsdag blei drillinga av Heggem og Ajer eit tema. Solbakken svarte da kort:

– Vi drillar litt ulikt. Torbjørn blei drilla han, men det blei 14–15 andre òg, sa landslagssjefen.

– Dette hadde eg ikkje trudd

NRK-ekspert Kristoffer Løkberg følger landslaget tett, han er overraska over at Solbakken truleg vel som han gjer i midtforsvaret.

– Dette hadde eg ikkje trudd. Eg trudde han skulle gå for det trygge i Østigård, den som har mest erfaring og spelt mest under Ståle. Leo kjenner også måten han speler forsvar på. Men han har tydelegvis ikkje blitt overtydd av Østigård, samtidig som Heggem må ha overtydd på dei siste samlingane han har vore med på.

– Same ellevar to treningar på rad. Kor trygg er du på at dette er laget?

– Med mindre nokon blir skadde eller sjuke inn mot kamp, er eg så trygg som ein kan bli på at dette er laget som startar mot Italia, seier Løkberg.

Kristoffer Ajer vil ikkje slå fast noko som helst da NRK snakkar med han onsdag.

– Kven som startar, det er eg usikker på framleis, men Heggem leverte ein god kamp mot Israel. Han er ein veldig fin fyr. som eg passar godt med. Men Leo, Jostein (Gundersen) og Colin (Rösler) har også levert frykteleg godt i lang, lang tid, seier Ajer.

Torbjørn Heggem svarer slik på spørsmål frå NRK om kvifor Solbakken bør velje han mot Italia:

– Det blir opp til han. Det eg kan gjere, er å vise meg frå mi beste side på trening. Vise at eg er i form, og vise at han kan stole på meg i den kampen, seier Heggem til NRK.

– Det einaste rette

Løkberg meiner det vil vere eit fornuftig val å gå for Ajer saman med Heggem mot Italia.

– Det er den beste norske ellevaren per dags dato. Det store spørsmålet har vore kven som skulle bli stopparmakker til Ajer, men eg meiner det er rett å velje Heggem, som kom frå ein veldig god sesong i West Bromwich, kontra Østigård som har variert meir i prestasjonane, seier Løkberg.

– Ut frå treningane virker han å gi Nusa sjansen frå start, trass i lite speletid i det siste. Kva synest du om det valet?

– Det er det einaste rette å gjere no som Nusa har komme tilbake i grevens tid. Eg ser for meg ein Nusa som kan skape trøbbel for Italia den første timen, men når han blir sliten har vi alternativ. Men at Nusa skal starte for Noreg når han er skadefri og kampklar, det er sjølvsagd, meiner han.

• Kampen startar 20.45 fredag kveld. Kampen kan du sjå på TV 2 eller høyre på NRK Sport på radio.