Mannen hennar fekk ein verdig slutt – fryktar tilbodet blir svekka

Mannen til Daghild Breivik døydde i fjor av alvorleg lungesjukdom. Dei siste fem månadene av livet, fekk han behandling ved den lindrande eininga ved Blindheim omsorgssenter.

– Dei tok imot oss med opne armar. Du kjende varmen og tryggleiken med ein gong. Og tryggleik er meir enn medisin når du er alvorleg sjuk, seier Breivik.

Ho kan ikkje få fullrost kompetansen og måten han blei ivareteken på.

– Det betydde alt. For dei såg oss, og dei såg meg. Dei såg kva Bjarne trong. Vi kjende oss så trygge på at han hadde det så godt som mogleg dei siste dagane.

Åtvarar mot å svekke tilbodet

Framleis stikk ho innom for å helse på personalet. Ho er oppgitt og sint over at Ålesund kommune vurderer å endre tilbodet.

– Dei forstår ikkje kva dei snakkar om. Å byrje å smuldre opp den kompetansen som sjukepleiarane og legane har ... Nei, den er gull verd.

Daghild Breivik hilser på Nina Helle som har vore tilsett ved lindrande eining sidan 2010.

Dei tilsette er ekspertar på palliasjon, altså å ta vare på alvorleg sjuke og døyande. Det er slike tilbod ved alle sjukeheimane i Ålesund og i heimetenesta, men dei aller sjukaste som treng mest hjelp får komme til spesialavdelinga på Blindheim.

– Dette er et unikt tilbod som er bygd opp over lang tid, seier Nina Helle, plasstillitsvald i Norsk Sykepleierforbund.

Men no kan det bli endringar, for kommunen vurderer å endre tilbodet til dei døyande.

– Eit paradoks

Ei arbeidsgruppe skal finne ut kor mange slike spesialplassar det skal vere, kvar dei skal vere, og om det skal opprettast team som skal reise heim til dei døyande. Sunnmørsposten omtalte saka først.

Eit av forslaget frå kommunalsjefen er å redusere talet på spesialplassar frå åtte til fem. Tilbodet vil da framleis ligge over gjennomsnittet for større kommunar i Noreg, ifølge kommunen.

Det er åtte senger på avdelingen i dag.

Helle synest det er eit paradoks at når kommunen er blant dei beste i landet, så ønsker leiinga å ha færre plassar. Ho trur at kutt og flytting vil føre til at folk finn seg andre jobbar.

–Dette er et tilbod som absolutt trengst. Å risikerer at denne kompetansen forsvinn, vil vere et kjempetap for kommunen.

Men ifølge kommunalsjefen handlar dette ikkje om å redusere tilbodet, men å finne andre måtar å jobbe på.

Redd kommunen undervurderer kompetansen

Hans Jakob Hunnes, som er konstituert overlege ved Ålesund sjukehus, har engasjert seg i saka. Han jobbar i palliativt team ved Ålesund sjukehus.

– Det eg er redd for, er at ei omstilling som fører til tap av kompetanse, kan gi eit dårlegare tilbod til denne pasientgruppa.

Han spør seg om kommunen skjønner kor godt tilbodet på Blindheim er i dag.

– Du må sjå heile mennesket. Det krev spisskompetanse. Eg er redd ein undervurderer kor spesialisert og god denne kompetansen er, sier Hunnes som uttaler seg som fagperson, og ikkje på vegne av Helse Møre og Romsdal.

Vil styrke ambulante tenester

Befolkninga i norske kommunar er i endring: Vi blir fleire, eldre og sjukare, og fleire lever lenger med alvorleg sjukdom.

Kommunalsjefen Synnøve Vasstrand Synnes vil ikkje bli intervjua, men skriv til NRK at det er behov for å lage ein heilskapleg plan for det palliative tilbodet i kommunen, som inkluderer heile pasientforløpet og alle aktørar.

Mellom anna skriv ho at det er behov for å styrkje dei ambulante tenestene, og at ein bør vurdere å samle desse med dei spesialplassane.

Ifølge Vasstrand Synnes er det ikkje målet å spare pengar, men kommunen skal levere gode og likeverdige tenester til alle.

Det blir førebudd ei sak til politisk behandling i juni.

Kjenner igjen debatten

Leiaren i Norsk foreining for palliativ medisin, Ingeborg Skulberg, seier diskusjonen i Ålesund ikkje er unik. Ho fortel at fleire kommunar vurderer å kutte eller endre tilbodet, særleg i periodar der kommunane må spare pengar.

Ho meiner at ambulante team kan vere eit godt supplement, men ikkje kan erstatte alle spesialplassane rundt om i landet.

– For veldig mange er det et godt og trygt tilbud. Men nokre sjukdomsforløp er så kompliserte og krevande at det blir svært vanskeleg å handtere det heime eller på vanlege sjukeheimplassar.

Skulberg peikar særleg på yngre pasientar med barn som pårørande der god oppfølging kan vere viktig for å førebygge kompliserte sorgprosessar.

Leiaren rår også Ålesund kommune til å lytte til dei tilsette i den vidare prosessen.

– Dei har oversikt over kva arbeidet faktisk inneber og kva behov desse pasientane har.

Håper politikarane vil seie nei

Daghild Breivik håper politikarane vil seie nei til å gjere endringar for spesialavdelinga på Blindheim.

– Den må finnast. Vi blir eldre, vi blir sjukare, og vi treng ei slik avdeling i aller høgaste grad. Ålesund kommune må forstå at dei må ta vare på det som er bygd opp, og som er så bra.