Mæhle går av – Eirik Tenfjord blir ny finansbyråd

Jacob Mæhle (H) går som finansbyråd av omsyn til familien sin.

Klokka 10.00 i dag blei den tidlegare rådgjevaren og konsulenten Eirik B. Tenfjord (H) presentert som ny finansbyråd for byrådsleiar Christine Meyer (H).

Tenfjord kjem inn i byrådet frå ei konsulentstilling, men har òg ei fortid i byrådet.

Han var for rundt ti år sidan rådgjevar for ei rekke Høgre-byrådar i Bergen – mellom anna Meyer den tida ho var helsebyråd i Bergen.

Vel å merke varte det ikkje lenge før Meyer gjekk vidare til jobben som konkurransedirektør.

– Det var vel ei veke me hadde i lag før du gjekk vidare, seier Tenfjord til byrådsleiaren.

– Eg håpar det varar litt lenger denne gongen.

Den NHH-utdanna siviløkonomen er klar over at han tar over ein vanskeleg jobb.

– Ja, ein må nok tole litt offentleg pisk, men sånn er politikken. Samstundes er det ei stor fagleg utfordring som trekker meg til jobben, seier Tenfjord.

Mæhle går av for familien

Han blir dermed den tredje finansbyråden sidan Meyer-byrådet tok over hausten 2023.

Bergen kommune melde måndag morgon at Mæhle har bestemt seg for å gå av som finansbyråd for å prioritere familien.

Saman med kona og deira fire månadar gamle dotter flytter han tilbake til Oslo, der kona skal tilbake på jobb og han skal ha foreldrepermisjon.

– Det er ikkje så interessant å pendle når kona min kjem tilbake til jobb, og då er det riktig for begge to at eg flyttar tilbake med familien til Oslo.

Mæhle seier at byrådar har krav på etterlønn når dei går av, men at han ikkje har sett seg inn i kva den lønna er.

– Flyktar ikkje frå eige budsjett

Mæhle går av etter om lag halvanna år i jobben, og før budsjettet for 2026 er ferdig behandla og vedtatt i bystyret.

– Er det eit litt rart tidspunkt å gå av på?

– Det som har vore viktig er at byrådet har levert vårt budsjett, som Jacob har gjort mykje av jobben på. Vårt arbeid skjer først og fremst før vi leverer det budsjettet, seier byrådsleiar Meyer.

Ho vil ikkje seie noko om kor lenge ho har visst at Mæhle ville gå av.

– Eg har prøvd å få Jacob til å stå så lenge som mogleg, men har veldig respekt for at han no prioriterer kona og dottera si, seier ho.

Mæhle avviser at dette har vore planen sidan han tok byrådsjobben i august i fjor, og seier han gjerne skulle sett budsjettet heilt i mål.

– Dette er ikkje fordi eg ønskjer å springe frå effekten av eige budsjett, seier Mæhle om tidspunktet.

– Òg i Oslo kuttar dei mykje i budsjetta, det er slik det er i Kommune-Noreg om dagen.

– Lærerikt, gøy og vanskeleg

Den avtroppande finansbyråden ser ikkje mørkt på at det er Tenfjord som tar over.

– Eg kjenner han som ein dyktig, smart og hardtarbeidande fyr, så eg trur pengane er i trygge hender, seier Mæhle.

– Så vil eg seie at han kjem til litt meir «duk og dekt bord», og ikkje like «duk og knekt bord» som eg gjorde, seier han og viser til eigen innsats.

Mæhle beskriv jobben som lærerik, gøy, motiverande – og vanskeleg.

– Det er tungt å prioritere stadig strammare på vegner av kommunen. Men det er først og fremst ein veldig kjekk jobb å få, seier han.

Dei to budsjetta han har lagt fram som finansbyråd har vore prega av kutt og effektivisering, og har vekt reaksjonar.

Sist då opposisjonen meinte kutta på 400 millionar i budsjettet for 2026 var usosiale.

Den nyleg avgåtte finansbyråden seier han står inne for budsjetta han har levert.

– Det har vore eit svar på situasjonen i Kommune-Noreg. Når staten ikkje har hjelpt oss meir enn den har må kommunen gjere jobben sjølv, og den meiner eg me har gjort godt.

– No skal eg klippe meg og få meg jobb

Meyer takkar Mæhle for innsatsen som finansbyråd.

– Jacob har spelt ei viktig rolle i omstillingsprosessen vi nå står midt i for å gjere kommuneøkonomien berekraftig. Han har også løyst flokar og sikra framdrift for viktige prosjekt i byen, som utviklinga av Dokken.

– No skal eg gjere det vi på høgresida er veldig opptatt av, nemleg å klippe meg og få meg ein jobb, seier Mæhle om framtida i Oslo.

Men førebels har han inga aning om kva jobb det blir.

– Draumejobben er å vere finansbyråd i Bergen kommune. Så får eg finne ein ny ein, seier han.