Kva skal eg gjere med livet mitt?

Det er snart søknadsfrist for å søke høgare utdanning.

Før midnatt 15. april skal valet takast. Uæææ.

Det er faktisk ein overflod av moglegheiter.

Det finst nesten 1400 studium å velje mellom her i landet.

Er du éin av dei som går rundt og tenker:

«Kva skal eg gjere med livet mitt?»

Denne saka er til deg.

Maren Aas Nakken (35)

Yrke: Dagleg leiar og manager i Mothership Stories

Utdanning: Bachelorgrad i PR, kommunikasjon og media ved Høgskulen i Volda (HVO).

🥕: Eg jobbar med folk som er lidenskapelege. Det gjer kvardagen min rikare!

– Kva bør folk tenke på når dei skal velje studie?

– Folk må kjenne litt etter og tenke på kva dei trivst med. Viss du er skikkeleg lost, så teikn opp eit kart. Skriv ned kva du synest er gøy og kva eigenskapar du har, som er bra.

Du kan også spørje ein nabo eller ein ven om kva du er god på.

– Ikkje gjer det kompisen din skal. Eller høyr på kva andre meiner. Då blir ein eit bittert menneske, trur eg.

– Korleis får ein eit bra liv?

– Altså, hobbyar. Det er så viktig. Då ladar du jobbhovudet ditt. Det gir også balanse. Det trur eg heile livet handlar om.

Robert Næss (60)

Yrke: Investeringsdirektør i Nordea

Utdanning: Bachelorgrad i dataingeniør ved Høgskulen på Vestlandet (HVL), master i siviløkonomi ved Norges Handelshøyskole (NHH).

🥕: Jobben er utfordrande. Du kan aldri seie deg fornøgd.

– Kva bør unge tenke på når dei skal velje studie?

– Tenk på kva jobbar du kunne tenke deg. Du kan godt ta eit studium som ikkje er det mest spennande, så lenge det gir deg interessante jobbar.

Alle bør vere litt sjakkspelarar. Finn først ut kva du eigentleg vil, så blir utdanninga ein konsekvens av det.

– Kva er den største feilen du kan gjere?

– Det er å velje eit studium litt sånn bevisstlaust. Det synest eg er feil. Då sløsar du med di og andre si tid. Då er det betre å jobbe og få litt erfaring.

Therese Skodvin (39)

Yrke: Dommar i Hordaland tingrett

Utdanning: Mastergrad i rettsvitskap ved Universitetet i Bergen (UiB).

🥕: Det er spennande. Du får vere tett på veldig mykje som skjer i samfunnet. Eg lærer nye ting og utviklar meg heile tida.

– Kva bør unge tenke på når dei skal velje studie?

– Du må våge å «gutse» litt og tru på deg sjølv. Gå etter det du har lyst til, sjølv om det verkar skummelt.

Og når du har valt: Tør å ta plass og ikkje ver for sjølvkritisk. Det som er spennande, kan òg vere krevjande. Men prøv å stå i det til du finn ut om det er noko for deg.

Dagrunn Waag Linchausen (71)

Yrke: Lege (tidlegare legevaktsjef i Bergen)

Utdanning: Siviløkonomi ved Norges Handelshøyskole (NHH) og medisin ved Universitetet i Bergen (UiB)

🥕: Du kan gjere ein forskjell for nokon.

– Kva bør unge tenke på når dei skal velje studie?

– Ikkje la status styre det du vel. Viss du er god i jobben din og mot kollegaene dine, så nyt du ein respekt som langt overgår det.

Dagrun møtte veggen etter mange år i næringslivet. Då starta ho heilt på nytt. Ho var nesten 50 år då ho bestemte seg for å bli lege.

– Vel du feil, kan du alltid velje om igjen. Den moglegheita har vi, alltid.

Sverre Dingsøyr (32)

Yrke: Prosessteknikar i Norsk Hydro

Utdanning: Fagbrev i kjemi og prosess

🥕: Å jobbe med dedikerte folk!

– Kva bør unge tenkje på når dei skal velje utdanning?

– Du må gi litt f*** i kva andre tenker. Det er viktig å lytte til andre, men ver kritisk når du lyttar. Still spørsmål tilbake.

Sverre gjekk fyrst fire år på lærarutdanning, men fant ut at det ikkje var noko for han. Han føler at han sløsa bort åra.

– Eg følte vel eit lite press frå familie og sånt. Dei forventa at eg skulle bli noko anna enn industriarbeidar eller mekanikar. Det vil eg sterkt frårå andre.

Uansett kva du blir, er ikkje det A-L-T.

– Å bli lukkeleg handlar ikkje berre om jobb, finn deg noko å kople av med. Fritidsinteressene kan vere akkurat like viktig.

Oddvar Torsheim (86)

Yrke: Bildemakar, grafikar og forfattar

Utdanning: Kunstnar ved Kunst- og designhøyskolen i Bergen og Det Kongelige Danske Kunstakademi i København

🥕: Prosessen og utviklinga ved å skape noko fysisk.

– Kva bør unge tenkje på når dei skal velje utdanning?

– Det er viktig å ta val og ta ein sjanse. Det sa Piccaso og. Det er ikkje dumt å høyre litt på foreldra. Men den indre stemma er viktigast.

– Kva er den største feilen ein kan gjere?

– Ein må ikkje venne seg til å henge for mykje i barar. Det er veldig freistande å stikke av frå alt saman. Mange tenkjer at ein slappar av på fest, men det gjer ein ikkje. Ein stikk av.

– Korleis veit ein når ein har valt rett?

– Når noko kjem attende og attende, og ein lykkast med det ein gjer, må ein ha gjort noko rett.

Anja Bakken Riise (37)

Yrke: Leiar i Framtiden i våre hender

Utdanning: Bachelorgrad i utviklingsstudium ved Oslo Met

🥕: Eg får bruke masse tid på noko eg verkeleg brenn for!

– Kva bør unge tenke på når dei skal velje studie?

– Studer noko du er nysgjerrig på eller vil lære meir om. Ikkje tenk på kva du skal bli til slutt. Du kan ta nye val undervegs. Senk skuldrene.

Studia har vore lite avgjerande for jobben ho har i dag. Det har vore viktigare å ta plass og tørre å søke på krevjande jobbar. Sjølv med lite erfaring.

– Kva er den største feilen du kan gjere?

– Den er å høyre på foreldra sine. Ikkje høyr på kva andre synest at du passar til. Kjenn etter sjølv.

Då er du kanskje litt klokare før du skal ta ditt neste val.

Og hugs: Fristen er 15. april.