Kutta sendinga til TV-stasjonar i Kenya

Tusenvis av menneske har onsdag gått ut i gatene i fleire byar i Kenya for å markere eittårsdagen for dei landsomfattande protestane mot styresmaktene i landet.

I fjor blei minst 60 personar drepne av tryggingsstyrkane demonstrasjonar mot ei ny skattelov og den økonomiske situasjonen for unge i Kenya, skriv AFP.

Det toppa seg 25. juni då demonstrantar storma parlamentet, og president Willem Ruto måtte legge skatteplanane på is.

To skotne og drepne

Onsdag var det nye demonstrasjonar fleire stader. Det starta fredeleg, men protestane utvikla seg då demonstrantar og politi støytte saman.

Bilete frå Nairobi viser øydelagde bilar, demonstrantar som kastar stein, medan politiet bruker vasskanonar og tåregass.

I byen Matuu blei to demonstrantar skotne og drepne, opplyser det lokale sjukehuset. I tillegg er minst åtte andre skadde i byen.

I Nairobi skal minst 50 menneske vere skadde i samanstøytane, ifølge BBC.

Stenger TV-stasjonar

I forbindelse med demonstrasjonane har styresmaktene teke fleire TV-stasjonar av lufta for å hindre direkteoverføringa av demonstrasjonane, skriv Reuters.

Nation Media Group som eig ein av kanalane som blei stengt, NTV, seier politiet tok seg inn i sendekontrollen for å skru av signala.

– Nedstenginga av NTV er eit direkte inngrep i vår redaksjonelle verksemd, seier skriv dei i ei melding.

TV-kanalen KTN blei også teken av lufta onsdag ettermiddag. Dei held fram med å strøyme demonstrasjonane på sosiale medium, som YouTube, Facebook og X, melder Reuters.