Klæbo vil ramme inn lykkeboksaren – og selje for ei god sak

Tre løp. Tre gull. Totalt åtte OL-gull, likt med Marit Bjørgen, Ole Einar Bjørndalen.

Tar Johannes Høsflot Klæbo eit gull til i Val di Fiemme, tronar han aleine på lista over tidenes mestvinnande vinterolympiarar.

Tar han to, er han nummer ti på lista over tidenes mestvinnande olympiarar uansett sommar eller vinter – med berre svømmelegende Michael Phelps framfor seg på lista.

Forklaringa på suksessen?

– Det enkle svaret er at han er den beste skiløparen i verda, den beste skiløparen i historia, seier Eirik Myhr Nossum.

– Ein av dei største atletane

Men landslagstrenaren stoppar ikkje der:

– Han er ein av dei største atletane verda har sett. Det er den enkle forklaringa. Han er berre så vanvitig mykje betre enn alle andre.

Før OL prøvde NRK å samanfatte nokre av årsakene til at Johannes Høsflot Klæbo er ein langrennsløpar verda aldri har sett maken til:

Nå viser det seg at artikkelen kanskje manglar eit vesentleg punkt.

For i løpet av den første OL-veka har det komme fram at det også er mykje overtru involvert i ein meisterskap for Klæbo og hans næraste.

Overtru

Då NRK snakka med far Haakon Klæbo under 10-kilometeren fredag, stod han på nøyaktig same stad som under dei to første løpa.

Forklaringa: Ei tribuneplassering som gir gull éin gong, forlèt ein ikkje så lenge det går bra.

Og det er meir:

– Passet til Johannes, det var i lomma her under VM i Trondheim, og det er det nå òg, seier Haakon Klæbo til NRK.

Trenar Nossum bidrar også på viset sitt.

– Helst i bilen på veg hit, men det kan også vere rett inn mot start, seier Nossum, og bekreftar at ritualet blei følgt før løpet fredag.

– Skadd folkeslag

– Vi er eit skadd folkeslag, vi som held på med det her. Eg ser ikkje på meg sjølv som ein overtruisk eller truande person, men ein blir veldig skadd av å halde på med det her. Når ein prøver å sjå seg sjølv utanfrå, så ser ein kor rar ein er. Men sånn er det, erkjenner Nossum.

Det er pappa Haakon og ikkje minst sambuar Pernille Døsvik som avslører at også Klæbo sjølv har heilt spesielle rutinar som må vere på plass.

– Han pakkar sekken likt før kvar konkurranse, han gjer dei same tinga. Vi snakkar saman ein halvtime før start. Det er ein del sånne rutinar som mange utøvarar har, seier Haakon Klæbo til NRK.

Døsviks avsløring er ein smule meir pikant.

– Eg trur han går med den same boksaren kvar gong.

– Så same boksar for kvar gullmedalje?

– Ja, det må jo bli det, da. Kvart skirenn. Det er gullboksaren. Det fungerer jo tydelegvis, ler ho.

– Andre ting?

– Sjølvsagt same boksaren

Klæbo drar på smilebandet når han høyrer om undertøyavsløringa, men han avkreftar han på ingen måte.

Tvert imot bekreftar han overfor NRK at alle dei tre gullmedaljane i desse leikane er tatt i den same underbuksa, som også gav han seks gull under VM i Trondheim for eit knapt år sidan.

– Eg har sjølvsagt den same boksaren, men han er vaska heldigvis. I VM torde eg ikkje vaske han eingong. Men det har eg gjort nå, så nå er eg «good».

– Er det meisterskapsboksar, eller bruker ho den i kvart løp?

– Nei, det er meisterskapsboksar. Så den rammar vi inn og donerer til ei god sak etter OL, seier Klæbo.

Ni gull på rad i meisterskap er ei imponerande bragd av ei underbukse. Og framleis har den ein jobb igjen å gjere.

Ennå står stafett, lagsprint og 50 km klassisk fellesstart att.

Dei største favorittane?

Noreg med Johannes Høsflot Klæbo, Noreg med Johannes Høsflot Klæbo og Johannes Høsflot Klæbo.