Ikkje sikkert når Dovrebanen opnar

Natt til tysdag blei Otta bru stengd.

– Den har flytta på seg ti centimeter. Det er alvorleg nok til at vi stenger trafikken.

Det seier Philippe Olivier frå Bane Nor. Han er strekningsansvarleg i Innlandet.

Nå jobbar dei for å stabilisere brua, men lite tydar på at strekninga på Dovrebanen vil opne med det fyrste.

Strekningsansvarleg seier dei gjer det dei kan for at brua skal bli ståande.

– Eg meiner vi gjer riktige tiltak nå for at brua ikkje skal kollapse. Vi skal unngå det!

Men allereie for over eitt år sidan sa Bane Nor sjølv at tryggleiken mot ei brukollaps er låg.

Prøvde å sikre brua

Etter ekstremvêret Hans skreiv Bane Nor til NVE at brua ikkje var godt nok rusta til å stå i mot ein 200-årsflaum.

I mars 2024 skulle dei sikre både elva og brua.

Nå innrømmer Bane Nor at dei ikkje tok god nok høgde for opphoping av is.

– Løysninga som blei skissert då vart godkjent av alle dei involverte, seier strekningsansvarleg.

– Sjølvsagt må vi lære av det som har skjedd nå.

Strekningsansvarleg i Bane Nor meiner samstundes at det er for tidleg å slå fast, at arbeidet i mars har skulda for skyvinga av brua.

– Vi må ta den analysen seinare. Nå fokuserer vi på å stabilisere brua, seier Olivier.

– Skal man gå og surmule?

Toget mellom Dombås og Vinstra kan bli innstilt lenge.

På togstasjonen i Vinstra bytter togpassasjerane på veg til Trondheim over til buss.

Svein Øyen er på veg til Mosjøen.

Byttet til buss i Vinstra blir ein av to buss for tog han må ta i dag.

– Eg har nokre avtalar, men det er greitt berre eg kjem meg fram. Skal man gå og surmule for det her, spør Svein retorisk.

Også Erik Hancke, som skal rekke eit møte i Trondheim, tek byttet til buss med knusande ro.

– Det er helt greitt, det må ein godta, seier Erik.

SJ Noreg har persontrafikken over Otta bru.

– Det er ei trafikkert strekning. Vi ser alvorleg på alle stengingar av banestrekningar vi trafikkerer, seier Henrik Forseth, pressevakt i SJ Noreg.

Godstoga på Dovrebanen må køyre om Rørosbanen, ifølge Bane Nor.

Phillipe Olivier kan ikkje gje noko lovnad om når strekninga opnar igjen.

– Det er umogeleg å si nå kor lang tid det tar før vi kan opne strekninga. Vi må vurdere skadane og kva slags tiltak vi må gjere for at toget skal kunne gå igjen, seier han.

Bane Nor kjem med ny vurdering torsdag 30. januar.