Har funne leivningar i ruinane av hus på Bømlo

Det er funne leivningar etter menneske i ruinane etter ein kraftig brann på Bømlo natt til måndag.

Ein person var sakna etter brannen.

Det skriv Sør-Vest politidistrikt i ei pressemelding torsdag.

– I forbindelse med krimtekniske undersøkingar onsdag vart det gjort funn av leivningar. Det er for tidleg å konkludera med om dette er mannen som budde i huset, men me har ikkje komme i kontakt med vedkommande. Og er ikkje gjort kjent med at det er andre som er sakna i området, seier politifullmektig Astrid Meringen Schjetne i pressemeldinga.

Huset overtent då brannvesenet kom fram

Politiet vil no gjennomføra obduksjon for å identifisera avdøde, og for å kartleggja dødsårsak.

– Det kan ta tid å få desse svara, skriv Schjetne.

Det er også funnen ein død hund på staden.

Det var natt til måndag det byrja å brenna i ein einebustad på Moster i Bømlo kommune i Vestland.

Huset var totalt overtent då brannvesenet kom fram til staden.

– Når det er så høge temperaturar så har me ikkje moglegheit til å gå inn. Då er det utvendig sløkking som gjeld, forklarte innsatsleiar Jens Helge Habbestad i Bømlo brann og redning til NRK den aktuelle natta.

Held fram med undersøkingar

Ein person var registrert på adressa, og politiet prøvde lenge å finna ut om han hadde reist frå bustaden eller ikkje.

Men etterforskinga viste at han mest sannsynleg var i bustaden. Etter brannen har difor krimteknikarar, og seinare spesialtrent søkshund frå Kripos, gått igjennom ruinane.

Og onsdag gjorde dei altså funn.

– Det er ein krevjande åstad å undersøkja sidan det er totalt nedbrent, ifølgje politiet.

Dei held fram med undersøkingar i dag. Dei pårørande er informert om funna.