Håkon Bleken blir bisett - sjå direkte frå seremonien

NRK sender direkte frå seremonien i Nidarosdomen som begynner klokka 13.

Kunstnaren gjekk bort sist veke, 96 år gamal.

Blir bisett frå Nidarosdomen

– Eg synest det er flott at så mange får følge bisettinga og at så mange får anledning til å sette ord på kva han har betydd for Noreg, seier Inger Merete Hobbelstad, kulturkommentator i NRK.

Hobbelstad seier Bleken skil seg frå andre kunstnarar ved at han har prega samfunnet over mange tiår.

– Det er sjølvsagt fordi han var så rasande aktiv heilt til det siste.

Ho seier Nidarosdomen sett ein fin ramme rundt bisettinga. Fleire av kunstnaren sine måleri har vore utstilt i domen.

– Det er jo også passande fordi Håkon Bleken, som så vidt eg veit ikkje var religiøs sjølv, var ein fantastisk fortolkar av religiøse motiv og bibelske historier.

Bleken sine glasmåleri i Spjelkavik kyrkje er av mange rekna som eit kunstnaren sine fremste verk:

Måla til det siste

Bleken fekk ein lang karriere som kunstnar.

I 1948-49 gjekk han på Kunstskulen i Trondheim. Gjennombrotet fekk han i 1971 med ein serie kullteikningar kalla «Fragmenter fra et diktatur».

Gallerist og ven, Per Høiem, fortalde at Bleken blei ein betre og betre kunstnar på sine eldre dagar.

– Han var heilt klar og måla berre betre og betre mot sine 96 år, sa Høiem dagen Bleken gjekk bort.

– Han var så samfunnsengasjert at bileta hans aldri blei uaktuelle. Dei var jo superaktuelle heile tida.