Gotikk trendar i ein uroleg verd: – Eit moteopprør

– Gotisk kultur handlar om fridom, at du kan vere deg sjølv. Kapitalisme passar ikkje inn.

Det seier Selina Lanton (20), som sjølv er gotar.

Ho er kritisk til at stilen har blitt omfavnet av den luksuriøse moteverdenen.

Det er nemleg gotisk mote som gjeld i haust, ifølge dei store motehusa.

Vi møter ho i kollektivet hennar i Oslo.

– Heilt ærleg synest eg det er litt kult å sjå det på catwalken, men det blir feil at dei gjer det. Det går imot ideologien til subkulturen.

For Lanton og mange andre er hennar klede ein viktig identitetsmarkør for hennar personligheit og meiningar.

Lanton meiner motehusa prøver å selje kulturen hennar som trendy klede. Meir politisk subkultur blant unge er eit symbol på ein uroleg verd, trur ho.

– Vi lever i eit veldig polarisert politisk klima akkurat nå. Moten følger det politiske, og gotikk er ein del av moteopprøret til venstresida.

I haustkolleksjonane til Dior og Chanel dukka det opp innslag frå gotisk mote på catwalken, ifølge fleire moteekspertar.

I tillegg har det den siste tida bredd seg om på TikTok.

Emneknaggen #goth har blitt sett nesten 45 milliardar gonger dei siste 7 dagane, ifølge tal frå TikTok.

Mote som eskapisme

Moteekspert og journalist i Dagsavisen, Sissel Hoffengh, er einig i at den gotiske motetrenden vi ser nå kan vere eit motsvar til situasjonen i verda.

– Gotarar er ofte dei som omfamnar ei ikkje-fascistisk haldning, og som er opptatt av inkludering og mangfald. Det er ofte venstrevridne folk.

– Det verkar som eit motsvar på høgrebølga vi ser verda over, meiner Hoffengh.

Det er moteredaktør i KK, Ida Elise Eide Einarsdóttir, einig i.

– Om ein ser mote som litt meir enn berre klede har det ofte ei forgreining inn i politikken.

– Verda vi lever i nå er mildt sagt usikker, det blir spegla i moten.

– Mote kan fungere som ein slags eskapisme, seier Eide Einarsdóttir.

Vil bli gammal gotar

20-åringen blei gotar da ho var 15 år.

– Mor mi var veldig lite skeptisk, berre litt til piercingar og sånt. Det ville vel dei fleste blitt dersom den 15 år gamle dottera di vil ta ein ku-ring i nasen.

Utanom det politiske er det ikkje viktig for Lanton kva andre gotarar er opptatte av.

– Det er standarden for dei fleste gotarar å høyre på gotisk musikk og å ha venstrevridne meiningar.

Og for henne er ikkje gotikken ein fase.

– Eg håpar å bli gammal som gotar.