Furuseth etter TV-nekt: – Det viktigaste prosjektet held fram

Else Kåss Furuseth skriv på Instagram at «at det viktigaste prosjektet held fram», etter at det i dag blei kjend at NRK utset TV-serien og podkasten som var planlagd.

Ho viser då til arbeidet mot einsemd gjennom partiet Ensomhetspartiet.

– Eg ønsker å bekjempe utanforskap. Difor starta eg eit parti.NRK har avgjort at det ikkje blir TV-serie no, men det viktigaste prosjektet for meg held fram, skriv ho på Instagram.

NRK har tidlegare understreka at TV-serien ikkje skulle vere valkamp for partiet og skulle publiserast etter valkampen.

– Difor tok vi ei ny vurdering no, og set opptaka på pause for å ikkje bidra til politisk støy. Vi vil gå i ny dialog med Else etter valet, seier eksternsjef i NRK, Jostein Olseng.

Utset ny podkast

Furuseth har hatt også ulike podkast-prosjekt for NRK.

Redaksjonssjef i underhaldningsavdelinga i NRK, Tone Donald, seier til NRK at dei no også utset ein ny podkast med Else Kåss Furuseth og Markus Neby.

– Denne utset vi vidare planlegging av i lys av det som har skjedd. Vi ser at Markus og Else ikkje ønskjer å vere med vidare med ein ny underhaldningspodkast no, seier Donald.

– Kva har desse sakene å seie for Else Kåss Furuseth sitt kontraktforhold til NRK?

– Det får ikkje nokon direkte konsekvensar akkurat i dag. Ho har lenge vore ein profil på podkast og lyd for NRK.

– Skaper støy

På spørsmål om den planlagde TV-serien kjem til å bli sendt seinare, svarar NRK:

– Vi må gjere ei ny vurdering etter valet.

Han peikar på at NRK hadde veldig tydelege retningslinjer for kva produksjonen kunne bidra med og ikkje under opptaka.

Serien skulle uansett ikkje sendast før etter valet.

– Men reaksjonane som har kome, skaper ein støy som verken serien eller det politiske landskapet har godt av, meiner Olseng.

– Har forståing

Avgjerda om å setje serien på pause er gjort i samråd med Furuseth.

– Ho har stor forståing for dette og er einig i valet, når ein ser korleis det har blitt oppfatta. Det kjem òg i vegen for hennar politiske arbeid. Så ho støttar, slik eg oppfattar det, avgjerda vi har tatt, seier eksternsjefen.

Blant dei som har kome med reaksjonar på TV-serien er samfunnsdebattanten Eivind Trædal.

– Det er ei veldig merkeleg rolleforståing av NRK å promotere eit politisk partiprosjekt, meiner Trædal i VG.

Til NRK seier han at han meiner at TV-serien i praksis ville ha vore med på å sponse valkampen til eit politisk parti.

–Ein har altså halde fram med å tenke på Else som ein entertainer medan ho har tatt steget over til politikerrolla, meiner Trædal.

– Uvurderleg innsats

Ein annan som gjekk hardt ut mot serien er redaktør for Medier24, Erik Waatland.

Han peikar på at dette ikkje handlar om å fråta Else Kåss Furuseth truverd eller engasjement.

– Ho har gjort ein uvurderleg innsats for å setje psykisk helse og einsemd på dagsorden. Men NRK har ikkje mandat til å bli ein deltakar i valkampen, meiner Waatland.