Det kunne enda fatalt då ein mann i 30-åra utan forvarsel ringde på døra til ein perifer kjenning i heimbygda i Hustadvika i mars i år.
Med ein hammar gjekk han til angrep og slo mannen i 60-åra helselaus.
Naboar fortalde tidleg til NRK at dei høyrde skrik i det fredelege nabolaget.
No må ein mann i 30-åra i fengsel i seks år. I tillegg må han betale offeret 380 000 kroner.
Det slår dommen i Nordmøre og Romsdal tingrett fast.
Store styrkar leitte etter mannen etter valdshendinga i Hustadvika i mars.
Foto: Roar Jonny Strøm / NRKSlo med minst 15 slag
Retten konkluderer med at mannen slo den andre med hammar minst 15 gonger.
Retten meiner mishandlinga fort kunne endt med drap
:«Slik retten vurderer det framstår det å være tilfeldig at den volden fornærmede ble utsatt for ikke førte til at han døde. Hammerslagene kunne blant annet ha truffet ham i tinningen. Skade kunne også ha blitt større hvis fornærmede ikke hadde flyktet og forsøkt å vegre seg med hender».
– Det er ein dom vi meiner er riktig, at han skulle dømmast etter tiltalen for drapsforsøk. Det var oppfatninga min klient hadde, og han er selvfølgelig glad for at det blei utfallet, seier bistandsadvokat Peter Engebjerg.
I dommen kjem det fram at mannen hadde kjøpt inn tre ulike hammarar:
«Han har forklart at han valgte kulehammeren med aluminiumskaft, ettersom han fryktet at treskaftet på blikkenslagerhammeren ville knekke hvis fornærmede verget seg mot slag med hendene».
Bistandsadvokat Peter Kjergaard Engebjerg.
Foto: Roar Strøm / NRKKjøpte inn verktøy som han skulle angripe med
I retten nyleg fortalde mannen at planen var å skade mannen. Han ville ta hemn på vegner av ein kjenning, som han meinte hadde blitt dårleg behandla.
Politiet la fram i retten eit brev der mannen mellom anna skal ha skrive om kva han ønskte å gjere. Her heiter det mellom anna:
«Døden er livets største overraskelse og eventyr, og er dermed ingen straff».
Påtalemakta argumenterte i retten for at dette viste at han planla drap. I tillegg kjøpte han inn fleire hamrar, eit brekkjarn og brennbar væske.
Men mannen i 30-åra nekta for at han ville drepe.
I tiltalen heiter det at mannen skal ha sagt «eg skal drepe deg».
Dette er ikkje forsvararen hans, Astrid Bolstad, einig i. I retten peika ho på at det ikkje er mogleg å høyre at han seier det på lydopptaket som blei spelt av.
Forsvarar Astrid Bolstad meiner mannen ikkje planla å drepe.
Foto: Roar Strøm / NRKFramleis sjukmeld etter angrepet
Mannen i 60-åra hamna på intensiven etter angrepet.
Han fekk fleire brot i ansiktsskjelettet og ein tommel, samtidig som fleire tenner blei slått ut. Han fekk også hjerneskaking, bløding i hjernen og fleire kuttskadar.
Han er framleis sjukmeld, og sa i retten at det er vanskeleg å vere heime, der angrepet skjedde.
Politiet måtte fyre av varselskot då dei arresterte mannen etter fleire dagar på rømmen.
Foto: Eirik Haukenes / NRKBad folk låse dører
Politiet måtte leite i dagevis med helikopter, hundar og dronar før dei klarte å finne mannen i 30-åra som no er dømd.
Han gjekk i skjul og folk blei bedne om å låse dørene sine.
Då skal han ha søkt tilflukt i to ulike hytter. Han er også dømd for innbrot i hyttene og for å ha trua politiet med kniv då han blei pågripen.
Dommen frå Nordmøre og Romsdal tingrett er ikkje rettskraftig.
Publisert 13.08.2025, kl. 14.21 Oppdatert 13.08.2025, kl. 14.59