Frankrike og Noreg styrkar forsvarssamarbeidet i nord

Avtalen er ei styrking av samarbeidet med Frankrike, og er meint å skulle styrke den europeiske sikkerheita framover

– Vi skal utvide forsvarssamarbeidet, særleg i nord, til sjøs og i verdsrommet. Saman skal vi styrke den europeiske beredskapen og stå samla mot angrep på kritisk infrastruktur og forsøk på å svekke demokratiet, sa Jonas Gahr Støre

Avtalen omfattar blant anna forsvar og sikkerheit, støtte til Ukraina, klima og høgare utdanning og forsking.

I tillegg til avtalen om strategisk partnarskap, blei det også signert ei semje om transport av CO₂ over landegrenser med sikte på å lagre klimagassen.

Avtalen legg til rette for at klimagassar frå franske utsleppskjelder kan blir frakta til Noreg for å bli lagra på havbotnen i Nordsjøen.

Historiske band mellom Noreg og Frankrike

Macron understreka at Noreg og Frankrike har historiske band då han og Støre møtte pressa måndag ettermiddag.

– Noreg og Frankrike går hand i hand i forsvarssamarbeidet, sa han, og peika spesielt på Ukraina-bidraget.

Han seier Noreg kan rekne med Frankrike som ein påliteleg alliert.

– Vi ønsker at Noreg er tett involvert i prosjektet om eit meir uavhengig Europa. Vi ønsker tettare band, og Noreg er ein viktig partnar når det kjem til eit uavhengig og meir konkurransedyktig Europa.

Meiner USAs angrep ikkje i tråd med folkeretten

Støre sa måndag morgon at USAs angrep på Iran ikkje var i tråd med folkeretten.

– Folkeretten har nokre klare prinsipp om bruk av makt. På same tid har Iran eit atomprogram som skaper stor uro.

Støre fekk støtte frå Macron på pressekonferansen i Oslo måndag. Han sa at dei amerikanske angrepa ikkje er i tråd med folkeretten.

– Det finst inga lovlegskapsramme i desse angrepa, sjølv om Frankrike deler målet om at Iran ikkje må skaffe seg atomvåpen, sa Macron.

Og fordømde også dei israelske angrepa på Evin-fengselet i Iran, som skjedde måndag.

Tek avgjerd om fregattar snart

Besøket til den franske presidenten kjem medan Noreg er i sluttfasen for å lande kva fregatt det norske forsvaret skal kjøpe.

Det er snakk om kontraktar til over 100 milliardar kroner.

Den franske FDI-fregatten er eitt av fire alternativ Noreg vurderer. I tillegg er britiske, tyske og amerikanske fregattar med i vurderinga.

På pressekonferansen sa Støre at avgjerda om kva Noreg går for, vil bli kunngjort om kort tid.

– Vi skal kjøpe dei beste fartøya til den beste prisen frå den beste partnaren. Og vi kjem til å gjere dette på ein transparent måte, og vi er framleis i vurderingsfasen for å lande ein god kandidat, sa statsministeren.

Macron nytta høvet til å legge inn nokre ekstra godord for kvifor Noreg bør velje fransk.

– Eg vil seie at dette er det beste produktet. Vi produserer dei og brukar dei sjølve, og dersom du samanliknar med alle dei andre, jobbar dei hardt, men har mange utsettingar. Vi er klare til å levere og vi er veldig entusiastiske og forplikta, sa han.

Galla på Slottet

Brigitte Macron deltek også på besøket, og følger eit eige program saman med dronning Sonja.

Dei har blant anna besøkt Dronning Sonja Kunststall. Der møtte dei også elevar frå den franske skulen i Oslo. I tillegg har dei besøkt Munchmuseet i Bjørvika.

Måndag kveld har kongeparet invitert ekteparet Macron og fleire gjestar til gallamiddag på Slottet.