Forbod endra før Ed Sheeran-konsert

Til vanleg er det ikkje lov med flasker av glas eller plast inne på Ullevaal stadion.

Men på grunn av sommarvarmen i Oslo har arrangørane gjort eit unntak.

– Vi har drikkestasjonar og har også opna for at publikum kan ta med seg inn flasker utan kork.

Det skriv arrangør Stian Pride i ei tekstmelding til NRK.

– Nyt kvelden

Utanom endringane i flaske-forbodet, opplyser arrangøren at publikum har fått informasjon om kva som er lov å ha med seg inn på konsertområdet.

Arrangøren rår publikum til å vere tolmodig og nyte kvelden.

– Med god planlegging skal alt gå fint trass redusert kollektivtilbod. Ha ein fin kveld og bruk sunt konsertvett!

Politiet i Oslo er også til stades under konserten. Dei melder om god stemning og eit «fantastisk publikum» i Politiloggen.

– Det kjennast som Barcelona – men det er Oslo! Nyt kvelden, drikk vatn og dans med Ed!

Storfamilie i matchande T-skjorter

Ein gjeng som er spent før kveldens konsert er Sabina Koløy og familien.

– Vi kjøpte billettane i fjor og har gleda oss sidan, seier ho til NRK.

Ho innrømmer at det går mykje av Sheeran sin musikk på familien sin Spotify.

– Heile storfamilien reiser til denne konserten. Til saman er vi 14 stykk i år.

Verdsstjerna tilbake etter 13 år

Popstjerna Ed Sheeran har reist verda rundt med turnéen sin «ED SHEERAN: +-=÷X TOUR», uttalt Mathematics Tour, sidan 2022.

Med seg på scena har den britiske artisten Myles Smith og Tori Kelly.

No skal om lag 80.000 norske fans få høyre artisten live – 13 år etter hans førre konsert i Noreg.

– Noreg har vore tolmodig på at Ed Sheeran skulle ta turen tilbake. Det er enormt gledeleg at det no endeleg skjer.

Det sa arrangørane Stian Pride og Tim Salvesen i FKP Scorpio i ei pressemelding.

Konserten blei seld ut på få minutt. Det blei dermed sett opp ein ekstrakonsert same helg.

Nesten publikumsrekord

Totalt er det seld 37.000 billettar per dag.

Det er nesten Ullevaal stadion sin tilskodarrekord på 37.096 menneske.

Konsertarrangør Stian Pride er nøgd med at så mange fans som mogleg får oppleve artisten.

– Sheeran gjer som regel fleire konsertar same helg for å gi så mange som mogleg sjansen til å komme, skriv Pride i ei melding til NRK.

Konserten blir likevel skildra som ein «intimkonsert i megaformat».

– Sjølv om dette blir ein «intim» konsert for Sheeran å rekne, kan eg ikkje seie at det kjennast slik for oss, sa arrangørane i ei pressemelding.