Flaggstong knakk og vegar er stengde – det er varsla endå kraftigare vindkast tysdag

Vegtrafikksentralen melder om knekte tre ei rekke stader i Vestland fylke, frå Fitjar i sør til Nordhordland i nord.

I Bergen har politiet sperra av sentrale vegar som Jonas Lies veg og Kalvedalsvegen. Årsaka er frykt for at tre kan velte over vegbanen.

Dette er to av hovudvegane inn mot Haukeland universitetssjukehus. Hagerups veg er tilrådd som omkøyringsveg.

Delar av Festplassen i sentrum av byen er også sperra av etter at ei flaggstong har knekt, mens ei anna står med slagside.

– Ikkje alle forstår

Høgre felt i Christies gate er sperra av same grunn, fordi det er fare for at flaggstengene på staden kan gi etter. Dette er hovudgata for busshaldeplassane i sentrum.

Politiet er på staden, då ikkje alle forstår kvifor der er sperra av, melder operasjonsleiar Tatjana Knappen i Vest politidistrikt.

Bergen kommune er varsla.

Entreprenør er på veg til Jonas Lies veg for å felle treet som ifølge Vegtrafikksentralen «skal ha gynga heilt ned til røtene».

– Sidan ambulansar også brukar denne vegen, er det kritisk at treet blir fjerna, seier vaktkommandør Andreas Rasmussen til BA.

Ber sjåførar vere på vakt

– Dei siste timane har vore ganske travle. Det er mykje vind ute og mange trenedfall, seier trafikkoperatør Marianne Hove i Vegtrafikksentralen.

Ho oppmodar sjåførar til å vere oppmerksame:

– Du kan kome rundt ein sving og så treffe på eit tre i vegbana. Så det er lurt å vere litt obs når du er ute og køyrer. Særleg om du skal over bruer og har tilhengar, takboksar eller køyrer bubil.

Sjåførar som skal over Sotrabrua må også vere påpasselege.

– Her er det lurt å vere litt på vakt, særleg om du skal over med litt større køyretøy. Der er det sterk vind og det kan vere utfordrande køyreforhold, seier Hove.

Akkurat no er høgste vindkast på 20 meter i sekundet.

– No verkar det som at vinden er på topp, men så vil det roe seg utover kvelden, seier ho.

Blir vinden sterk nok blir brua stengt.

Men i tillegg til mykje vind, skal det også regne godt i området utover.

Også det kan skape utfordringar i trafikken med ein del overvatn.