EM-kometen blei grisetakla av rasande bror: – Det blei ein del krangling

– Eg gjekk inn med begge føtene, seier Sondre Gaupset til NRK og ler.

Når NRK møter familien Gaupset heime i Molde får det fram minner frå oppveksten – der det meste handla om fotball.

Saman med søster, bror, mamma og pappa har Signe Gaupset fått kopla av etter gjennombrotet for Noreg under EM.

To klassemål mot Island i debuten frå start fekk nasjonen til å måpe. Og prestasjonen førte til eit unisont krav om at 20-åringen også måtte starte i kvartfinalen mot Italia.

Kravet blei innfridd. Men Noreg tapte og rauk ut av meisterskapen.

– Skulle ikkje blande seg

På vegen fram mot toppen blei ho «herda» av å spele med gutane i oppveksten. Til ein viss irritasjon for storebroren.

– Ho var veslesøster, jente og to år mindre. Og skulle ikkje blande seg i mine saker, seier Sondre.

– Det blei ein del krangling, ja, seier Signe Gaupset.

Og under ei turnering på Lillehammer kom «oppgjeret» mellom dei to søskena då dei spelte for moderklubben Rival.

– Vi hadde to lag, men mangla spelarar. Så då måtte Signe steppe inn på det eine laget. Vi møtte kvarandre i åttedelsfinalen. Og då blei ho klipt ned, for å seie det mildt. Eg måtte vise kven som var best og eldst, ler storebror Sondre.

– Eg blei skamtakla av Sondre, supplerer Signe smilande heime på kjøkkenet i Molde.

– Raskare og sterkare

Men den røffe behandlinga har skapt eit av Noregs største fotballhåp.

Brann og Bergen er truleg berre eit førebels stopp på reisa mot større klubbar i utlandet.

Sidan moderklubben Rival ikkje hadde jentelag, måtte Signe Gaupset spele med gutane i oppveksten.

– Det var viktig for min del. Det er eit anna tempo frå ein er liten av. Gutane trykker jo til. Og eg har tolt mykje forskjellig. Eg trur det er grunnen til at eg har kome dit eg er i dag.

– Vi var ein gjeng med kompisar som spelte fotball heile tida fordi det var utruleg gøy. Vi «pusha» kvarandre heile vegen.

– Sakna du eit jentelag?

– Eigentleg ikkje, for det var så høg kvalitet. Eg treivst godt saman med dei. Dei spelte fotball heile tida på skulen. Så då blei eg med. Eg fann på ting saman med dei. Då var det jo stort sett fotball, så eg sakna jo eigentleg aldri noko jentelag, seier Gaupset.

Då ho var 15 år starta ho likevel på kvinnelaget til Molde i 2. divisjon. Samtidig trente ho fast med gutar 16-laget til Molde-akademiet.

– Dei er raskare og sterkare. Og så handlar det om at du må ta smartare og raskare val. Eg syntest det var gøy å utfordre seg på den måten, ein måtte vere skikkeleg «på» for å kunne prestere, fortel Gaupset.

– Vil til Meisterligaen

Fleire av gutespelarane som Gaupset vaks opp med har også spelt på aldersbestemte landslag, blant andre Gustav Nyheim og Andreas Myklebust (utlånt til Træff) som begge er i A-stallen til Molde.

No er Signe Gaupset også med i det ypparste selskapet både for klubb- og landslag.

Etter rolege dagar i Romsdal er landslagsspelaren klar for haustsesongen for Brann i Toppserien. Der har ho har kontrakt fram til sommaren 2027.

Etter EM har pågangen frå klubbar i utlandet berre vakse.

– Ja, det har vore mykje trykk. Men eg har agentar som tek seg av det. Dermed kan eg fokusere fullt og heilt på fotballen og prestere så godt som mogeleg der eg skal, seier Gaupset.

Agent Tore Pedersen opplyser til NRK at det er mange klubbar som er interessert. Og at dei har sagt nei til mange.

– Det er gode lag det er snakk om, seier Pedersen vidare til NRK.

Enn så lenge held Signe Gaupset fram ferien på Nordvestlandet før Toppserien startar opp igjen laurdag 9. august. Då møter Brann LSK Kvinner på bortebane.

– Eg har lyst til å spele i Meisterligaen kvart år og vinne turneringa. Draumen er å spele i dei store ligaene og mot dei beste laga. Samtidig tek eg det veldig roleg, eg trivst veldig godt i Brann. Å bytte klubb må følast riktig. Men samtidig er eg førebudd på at det kan skje når som helst, på ein måte, seier ho.