Elleville Meisterliga-krav: Her må VIP-ane parkere

• Kor sterkt lys skal det vere i lyskastarane?
• Når skal banen vatnast?
• Kor mange billettar skal bortelaget få?
• Kor mange VIP-billettar skal delast ut?
• Og kor skal VIP-tilskodarane sitte?

Spørsmåla er mange. Det er også svara i blekka «Regulering av Mesterligaen», eit 115 sider langt dokument med svar på det aller meste.

Gjennom 15 kapittel blir det beskrive korleis det meste skal gå føre seg når Meisterligaen kjem til Bodø.

Det er nøye beskrive kva slags behandling tilreisande Uefa-toppar skal ha.

– Standarden på desse fasilitetane skal vere minst like gode som den høgaste standarden på heile arenaen, står det beskrive i dokumentet.

• Første heimekamp i Meisterligaen er mot Tottenham 30. september.

VIP-område på 400 kvadratmeter

For kvar heimekamp krev Uefa gratis VIP-område på 400 kvadratmeter. Det blir presisert at dette skal vere utanom installasjonar som dører og rømmingsvegar.

Viss Bodø/Glimt går vidare til sluttspel, skal område aukast til 500 kvadratmeter.

VIP-området og VIP-plassane skal vere av høgaste standard, så Uefa skal ha fleire alternativ til vurdering.

Det er lite VIP over Aspmyra stadion i dag. Her fra kommentatorbua og utsiden av stadionen.

Eirik Joseph Loring Nilsen / NRK

«For å forsikre at den beste løysinga er vald skal heimelaga levere, om mogleg, to eller fleire moglegheiter for dette eksklusive VIP-området. Dette skal vere inne på stadion, ikkje markiser eller eksterne fasilitetar», skriv Uefa.

– Eg veit ikkje eksakt kor stort det er, men VIP-avdelinga er godkjent av Uefa. Dei tek nesten over heile VIP-avdelinga, så våre eigne partnarar får stort sett ikkje plass, seier Simen Pedersen, informasjonsansvarleg i Bodø/Glimt, til NRK.

– Under semifinalen mot Tottenham hadde vi VIP-avdeling i telt utanfor stadion til våre eigne partnarar, legg han til.

Krev parkeringsplassar som ikkje finst

Bodø/Glimt jobbar nå med å få i gang bygging av ny stadion. Eitt av diskusjonstema har vore parkering utanfor stadion.

Til kampane i Meisterligaen krev Uefa 200 parkeringsplassar i tilknyting til VIP-området.

Dei finst ikkje i dag.

– Store delar av parkeringa blir sperra av under kampar. Så Uefa må parkere på ein skule like i nærleiken, det er eit par minutt å gå, seier Pedersen til NRK.

Detaljerte beskrivingar

Svært lite er på slump når fleire av dei største stjernene i verda kjem til Aspmyra.

Vaktmeisteren på Aspmyra må vere nøye med vatninga, sjå berre på desse instruksjonane rundt vatning av kunstgras:

• Vatningsplanen må kommuniserast av heimelaget.
• Banen skal vatnast jamt, ikkje berre enkeltområde.
• Som regel skal vatninga vere ferdig 60 minutt før avspark.
• Vatning kan, etter ønsket til heimelaget, finne stad på andre tidspunkt
  • Mellom fem og ti minutt før kampstart og/eller
  • I pausen, men maksimalt fem minutt
• Dommaren kan endre planen for vatning av banen.

– Det er nokre få månader sidan vi spelte semifinale i Europaligaen, så det er ingen store omveltingar frå det, seier Simen Pedersen til NRK.

Nesten 1000 plassar til Uefa

På Bodø/Glimts heimebane er det plass til 8200 tilskodarar. Uefa tar nesten 1000 av billettane til Bodø/Glimts heimekamp i Europa.

I tillegg kjem det langt fleire frå pressa enn normalt. Representantar frå Uefa har vore i Bodø og fotografert fasilitetane. Pedersen fortel at klubben er i rute, men at fasilitetar for pressa må settast opp før heimekampane.

– Det er krav til mediefasilitetar som vi ikkje har i kvardagen. Så vi bygger mellombelse plassar før kvar kamp i Europa. Der sit vanlegvis sesongkort-innehavarar.