Droppa Syden-planar i varmen: – Tok heller noregsferie

– For to veker sidan sat vi og såg på restplassar til Syden. Då vi fann ut det var fint vêr i heile Noreg, tok vi heller noregsferie, seier Karina Refseth og Morten Nordsveen.

Saman med borna Marie og Mikkel har dei tatt turen frå Trondheim til Tueneset i Ålesund. Her nyt dei sommarvarmen.

Restplass bekreftar ein nedgang i trafikken på 10 prosent om ein samanliknar med juli i fjor.

– Juni var rekordmånad, men trafikken dalte frå 10. juli. Så det er heilt tydeleg at vêret har mykje å seia for vår del, seier Hans Kristian Birkeland som er dagleg leiar for Restplass.

Noreg toppar lista

Ferske tal frå Finn tyder òg på at mange nordmenn droppar Syden-ferien i år.

– Vi ser ein ganske tydeleg endring i søkemønstera. No er det Noreg som gjeld, seier Anette Syversen, direktør for Finn reise.

Syden-destinasjonane har tapt terreng. Spania var den mest populære destinasjonen i fjor. No har søkeinteressa for Spania falle med 58 prosent. Hellas har eit fall på 68 prosent, ifølgje Finn.

– Dette er sterkt knytt til varmen som dei fleste av oss nordmenn opplever om dagen, meiner reisedirektøren.

Auka interesse for Noreg

– Vi treng ikkje reisa til Syden. Det er varmt og godt her, seier Anette Ilebekk og Thomas Gilbert.

Saman med dottera Aurora har dei hatt ei natt i telt på Jomfruland i skjergarden utanfor Kragerø i Telemark.

– Noreg er deilig på sommaren. På sommaren er noregsferie perfekt, seier Signy Standal og Henrik Waje-Andreassen som også ferierer på Jomfruland.

Innovasjon Norge har ikkje klart tala for årets sommar enno, men seier at nordmenn i fjor ferierte nesten like mykje her heime som i pandemiåret 2021. Dei trur trenden vil halda fram.

– Generelt er interessa for å feriera i eige land mykje høgare no enn før pandemien. Vi har ein sterk vekst i «heimemarknaden», seier Siri-Ann Roska som kommunikasjonsansvarleg for reiseliv i Innovasjon Norge.

Fleire NRK har snakka med har valt å leggja ferien til Noreg denne sommaren, medan andre ferierer både her heime og i utlandet.

Roska i Innovasjon Norge peiker på at økonomien speler inn når familiar skal planleggja ferien. Fleire søkjer på aktivitetar som er gratis, og artiklane deira om feriehus og hytter er blant dei best besøkte sidene i år.

Svak krone

I tillegg gjer kronekursen det dyrt å feriera i Europa

– Når vi gjekk inn i nok ein sommar med svak kronekurs, venta vi at mange nordmenn også i år kom til å feriera i eige land, seier Roska.

For tredje sommaren på rad må vi nesten ut med 12 kroner for ein euro. I tillegg svekkja krona seg ytterlegare då Noregs Bank sette ned renta førre månad.

Syversen i Finn reise seier at dei har sett at land som til dømes Polen, Albania og Litauen har klatra på listene.

– Det handlar jo om kronekursen, og kvar ein får mest for pengane. Så det er eit mindre fall på desse landa, enn kva det for eksempel for Spania og Hellas.