Dramatisk vending i Sudan – skal ha tatt tilbake hovud­staden

Det skjer etter at regjeringshæren SAF starta ein ny offensiv mot gruppa Rapid Support Forces (RSF) i hovudstaden førre veke.

Det skriv avisa Sudan Tribune.

For første gong på to år skal SAF no ha kontroll over presidentpalasset og fleire regjeringsbygg i Khartoum, ifølge avisa.

Feirar i palasset

Store delar av Khartoum har vore kontrollert av den paramilitære gruppa RSF sidan krigen starta i 2023.

Kampane held på framleis. RSF sende fleire dronar mot presidentpalasset seinast fredag, melder Reuters.

Regjeringshæren seier de nå er i ferd med å fjerne RSF-styrker heilt frå hovudstaden, skriv BBC.

Rapid Support Forces har på sin side ikkje kommentert situasjonen i hovudstaden.

Video og bilete frå sosiale medium viser soldatar frå regjeringshæren feire inne i presidentpalasset.

– Vi er inne! Vi er inne i palasset, roper ein mann i militær uniform.

– Styrkane våre har beslaglagt store mengder utstyr og våpen som tilhøyrde fienden.

Det seier Nabil Abdallah, talsperson for regjeringshæren, på statleg TV.

Ekspert: Landet kan bli delt

– Det er mykje som tyder på at RSF må oppgi Khartoum sjølv om vi framleis kan forvente harde kampar.

Det seier Sudan-ekspert ved Christian Michelsens Institutt (CMI), Gunnar Sørbø, til NRK.

Sørbø trur likevel ikkje at krigen nærmar seg over.

– RSF kontrollerer det aller meste av det kjempestore området vest for Nilen, seier han.

– Dei har støttespelarar i regionen. Vi kan få ei langvarig deling av landet, slik vi har sett det i Jemen, Somalia og Libya.

Skuldingar om folkemord

Mange innbyggjarar skal vere positive til regjeringshæren sin framgang, ifølgje CNN.

– Dette er den beste nyheita eg har fått sidan starten av krigen, seier innbyggar Mohamed Ibrahim til Reuters.

– Vi ønsker berre å vere trygge igjen, seier han til nyheitsbyrået.

Informasjonsministeren i regjeringa, Khaled Al-Aiser, skriv på X at kampen mot RSF held fram.

– I dag heiste vi flagget, presidentpalasset er tilbake, og vi held fram til sigeren er sikra.

RSF har tidlegare blitt skulda for folkemord. Skuldingane har blant anna komme frå den amerikanske regjeringa.

Tusenvis av sivile skal vere drepne av RSF på bakgrunn av etnisitet, ifølgje CNN. Og eit ukjent tal kvinner skal ha blitt utsette for seksuell vald av gruppa.

Men også regjeringshæren SAF skal ha stått bak omfattande vald og overgrep mot sivile, kjem det fram i ein rapport frå FN.

Over halvparten av innbyggarane i Khartoum skal ha flykta sidan krigen byrja, ifølgje FN.

I heile landet har 8.8 millionar menneske blitt drivne på flukt, ifølgje FN. Dødstala er usikre, men estimert til opp til 150 000 menneske sidan krigen starta.

Det kjem også rapportar frå WHO om hungersnaud og utbrot av sjukdommar.

Interessert i utanriks? Hør siste episode frå vår podkast her: