Donald Trump er første president som er på Super Bowl

For første gong er ein sitjande president til stades under ein Super Bowl-finale.

Donald Trump har i fleire år vore ein skarp kritikar av NFL.

Han skapte sterke reaksjonar under si første presidentperiode i 2017 då han kritiserte NFL-spelarar som knelte under den amerikanske nasjonalsongen for å rette merksemd mot politivald og diskriminering av svarte amerikanarar.

Også popstjerna Taylor Swift er venta å vere til stades for å heie på sin kjæraste, Chiefs-spelaren Travis Kelce.

Rykta har gått om at 35-årige Kelce vurderer å leggje opp etter denne kampen, og fleire medium spekulerte i om han ville nytte høvet til å fri til Swift etter finalen.

Likar at Trump er der

Men spelarane er i forkant av kampen, diplomatiske når dei har blitt spurde om Trump sitt nærvær.

– Eg synest det er ei stor ære, uansett kven som er president, sa Travis Kelce under ein pressekonferanse, ifølgje BBC.

Hans lagkamerat, quarterbacken til Chiefs, Patrick Mahomes, var like diplomatisk:

– Det er alltid kult å spele framfor ein sitjande president.

Mange tilskodarar håpa likevel at kampen ikkje skulle bli prega av politikk.

– Eg håpar at han berre set seg og held seg roleg. Eg vil berre ha ein gøy kamp utan politikk, sa Debra Ward, ein lærar frå delstaden Virginia, til AFP.

Dåverande San Francisco 49ers-spelarane Eli Harold, Colin Kaepernick og Eric Reid under den amerikanske nasjonalsongen i protest mot politivald. Det som starta som ei markering mot urett, utvikla seg til ein større debatt om rasisme og ytringsfridom i USA. Eitt år seinare stod Kaepernick utan klubb etter å ha avslutta kontrakten sin i mars 2017.

Foto: Marcio Jose Sanchez / AP / NTB

Høg tryggleik etter terroråtak

Årets Super Bowl-finale blir spelt i New Orleans.

På nyttårsdagen blei byen ramma av terror då militærveteranen Shamsud-Din Jabbar køyrde gjennom ei folkemengde i den populære gata Bourbon Street.

15 menneske mista livet.

NFLs tryggleikssjef Cathy Lanier sa før kampen at dei har gått grundig gjennom tryggleikstiltaka, skriv nyheitsbyrået AFP.

Pauseunderhaldninga

Super Bowl er ikkje berre ein idrettshending, men òg ein stor kulturhending.

Super Bowl-halvtidsshowet er ein av dei mest sette musikkopptredenane i verda og ein viktig del av finalen.

I 2024 såg rundt 123,47 millionar menneske Usher opptre under pauseunderhaldninga, meldte Wall Street Journal.

Årets pauseunderhaldning blir leia av hiphop-artisten Kendrick Lamar, som nyleg gjorde reint bord under Grammy-utdelinga der han vann fem prisar.

Interessert i utanriks? Lytt til utanriksredaksjonen si podkast: