Brukar KI-bilete i Finn-annonsar: – Svekker jo tilliten

– Ein mistar jo tilliten til seljaren, seier Maria Skretting.

Saman med Teodor Fossdal ser ho på fleire annonsar på nettstaden Finn.no der bileta truleg er laga ved hjelp av kunstig intelligens.

Ingen av dei er begeistra for annonsane NRK viser dei.

– Det svekker jo tilliten til plattforma også om det dukkar opp slike annonsar. Så ein skulle jo tru det var i Finn sin interesse å ha eit forbod.

– Eg skulle ønske det ikkje var ein ting. Men det er vel noko som har kome for å bli, seier Fossdal oppgitt.

Både Skretting og Fossdal meiner det burde vere forbod mot å bruke slike bilete på plattforma.

– Ein får veldig «Temu-vibes», der bilete skal vere veldig forlokkande og så får ein berre noko tull, seier Skretting.

NRK har kontakta annonsørane som har laga annonsane som er vist i denne saka. Ingen av dei har ønskt å snakke med NRK.

NRK har merka bileta som er laga med hjelp av KI med «KI-generert».

– Eg er einig med deg i at biletet av heile skjenken er KI-generert, seier Heri Ramampiaro når NRK viser han bileta.

Han instituttleiar ved Institutt for datateknologi og informatikk på NTNU.

– Litt for glatte og unaturlege omgivnadar rundt, samanlikna med biletet som viser riper på treet.

Lenger nede i saka kan du lese Ramampiaro sine tips til å avsløre KI-bilete.

– Vi ser at fleire brukar teknologi

– Finn vurderer annonsar basert på om dei bryt med reglene våre, og ikkje nødvendigvis kva teknologi som er brukt.

Det fortel gjenbruksekspert hos Finn, Kathrine Opshaug Bakke.

Ho fortel at nettstaden ikkje har regler som forbyr bruken av bilete som er laga eller redigert ved hjelp av KI.

– Hovudregelen er enkel: Bileta skal gi eit riktig inntrykk av vara, fortel Bakke.

– Dersom ein brukar KI til å forbetre eller generere bilete må det ikkje bli skapt eit feilaktig bilete av produktet.

Ho fortel at dersom det blir brukt illustrasjonsbilete eller KI-generert innhald, så må det komme tydeleg fram i annonsen.

Bakke stadfestar at dei har sett ein auke i bruk av KI-verktøy i annonsane på Finn.

– Vi ser at fleire brukar teknologi for å forbetre bileta sine. Det kan for eksempel vere lysjustering eller opprydding i bakgrunnen.

Ho peiker på at tillit er heilt avgjerande i bruktmarknaden.

– Dei beste annonsane er de som viser vara slik ho faktisk er. Gode, ærlege bilete gjer det lettare å få respons og gjennomføre ein trygg handel.

Kan vere problematisk etter loven

Underdirektør i Forbrukartilsynet si tilsynsavdeling, Nina Elise Dietzel, fortel at dei er kjende med at det blir brukt KI-bilete i annonsar på Finn.

– Men vi har ikkje hatt nokre saker på dette hos oss, fortel ho.

– Vi ser ikkje på privatpersonar sin annonsering på Finn.no, men dersom det er næringsdrivande som annonserer på denne måten, er det noko vi kan vurdere.

Dietzel seier marknadsføringsloven ikkje har regler som seier at KI-bilete må merkast.

– Men det betyr ikkje at det er eit lovtomt rom.

– Loven forbyr villeiande marknadsføring, og etter omstenda kan bruken av kunstig intelligens i annonsering vere problematisk etter loven.

Dietzel peiker på at den auka bruken av KI gjer at problemstillinga blir meir og meir aktuell.

Vil bli krav om merking

– Regjeringa jobbar no med å innføre EU sin forordning om kunstig intelligens i norsk rett.

Det fortel digitaliseringsminister Karianne Tung (Ap). Ho seier forordninga stiller krav om openheit for enkelte KI-system.

– Eit av krava gjeld leverandørar sin plikt til tydeleg merking av bilete, video, lyd og tekst som er generert av eit KI-system.

Tung seier det er viktig at forbrukarar veit kva som er laga med KI slik at dei kan skilje mellom ekte og KI-generert innhald.

– Eg meiner prinsipielt at alt innhald som er laga ved hjelp av kunstig intelligens skal merkast, seier Tung.

– Det beste er å få sett produktet med eigne auge

Han fortel at KI har blitt betre dei siste åra og at dette stiller større krav til at ein er merksam og brukar sunn fornuft for ikkje å bli lurt.

– Det beste er å få sett produktet med eigne auge, seier Ramampiaro.

Han meiner det beste er om ein har moglegheita til å møte seljaren fysisk før ein gjennomfører handelen.

– Om ikkje så kan ein videosamtale der du kommuniserer med seljaren samstundes som han viser fram produktet vere ei god løysing.

Instituttleiaren fortel at han har gjort dette sjølv.

– Spesielt om det er dyre ting så ville eg i alle fall ha gjort det.