«Bondeklubben» gjer comeback i Eliten med traktortribune

– Me er stolte over traktortribunen, og eg trur også spelarane synest det er kult. Det gir ein ekstra «svung» over arrangementet, seier sportssjef Roger Eskeland i Bryne FK.

Konseptet er enkelt. Traktorar blir frakta inn på Bryne stadion og frå hengaren eller lessapparatet kan Bryne-fans følgja fotballkampen på nært hald.

Traktor-stuntet blei innført i fjorårets sesong i 1. divisjon – og då fekk det internasjonal merksemd.

Det kan det fort bli igjen, når konseptet også blir tatt med når nyopprykte Bryne FK er tilbake i Eliteserien søndag.

– Me er opptekne av å setja farge på Eliten med det som er vår identitet, seier marknadssjef Bjørn Hagerup Røken.

22 års ventetid er over for den tradisjonsrike jærklubben når Bodø/Glimt står på motsett banehalvdel på naturgraset på Bryne stadion søndag.

I fjor sjarmerte KFUM Oslo fotballfans i både inn- og utland med sitt berømte gangfelt mellom garderoben og stadion (sjå bildesveip under).

I år er Bryne den store Askeladden i toppdivisjonen – barndomsklubben til landets største fotballstjerne, Erling Braut Haaland.

Stolte bønder

Men traktorar er langt frå det einaste «bondske» på Bryne stadion.

På ståtribunen er det støypt to siloar til VAR-kamera. Eit konsept som vanlegvis blir brukt til å lagra vinterfôr til husdyra i norsk landbruk.

I tillegg er planen å kle kommentatorbua til eit fjøs. Bryne FK er nå opptatt av å reindyrka at dei er bønder frå Jæren.

– Me er ufatteleg stolte over landbrukskommunen me kjem frå. I tillegg har me masse gode samarbeidspartnarar som er relatert inn mot bondeyrket, som betyr mykje for plassen vår, seier Eskeland.

Haaland-effekt

Bonde-strategien fell i god jord hos Einar Braut.

Mannen med over 300 A-lagskampar for Bryne var med då «Jærens superlag»» sist spelte i toppdivisjonen, og blei kjent for den uvanlege yrkeskombinasjonen bonde og fotballspelar.

– Sjølv om Bryne har fått bystatus er me på Jæren. Derfor er det flott at klubben finn fram traktorane igjen og løftar fram identiteten.

– Så når dei syng «Gøy på landet» på bortetribunen, så blir de ikkje fornærma?

– Nei, det var skrik og mykje rare greier då eg og spelte, så det går bra.

Den gamle Bryne-helten peikar spesielt på Erling Braut Haaland sin suksess dei siste åra som ein nøkkel til Bryne-opprykket.

Også klubbleiinga peikar på Haaland-millionane som ei av forklaringa på Elite-comebacket, i tillegg til større kontinuitet på fleire postar i klubben og jærsk arbeidsvilje.

Ein av fire klubbar med naturgras

For ein ekte bondeklubb er det sjølvsagt naturgras som gjeld.

Bryne blir blant fire klubbar i Eliteserien 2025 som framleis har ekte grasdekke (dei andre er Brann, FK Haugesund og Rosenborg).

– Bryne stadion har alltid hatt rykte på seg for å vera blant dei beste i landet, og det trur eg den også vil vera i årets sesong, seier Eskeland.

Stikk til Bodø

Før seriepremieren mot Bodø/Glimt, sender jærbuane eit lite skremme-skot i retning «kunstgras-laget» frå Nordland.

Comeback-klubben har nemleg gjort filmopptak frå ei treningsøkt på eit jorde på Jæren.

Dette for å visa kva som møter gullfavoritten. I alle fall at dei må førebu seg på naturgras og jærbuar som vil gjera alt for å vinna «Davids kamp mot Goliat».

– Det blir veldig kjekt å endeleg få spelt kampar som betyr noko, møta dei store laga og spelar for mykje meir folk. Eg ser skikkeleg fram til å starta nå, seier Bryne-spelar Kristian Skurve Håland.