Blir samanlikna med Haaland: – Kanskje det er noko i vatnet?

– Sesongen har starta veldig bra. Ein kan ikkje klage.

Elisabeth Terland er audmjuk når ho får spørsmål om korleis livet i Manchester United er.

Ho spelar sin andre sesong for klubben. Ho blei toppskårar i fjor – og er på god veg til å kunne få til det same i år.

– Når ein presterer på det laget her, så skjønar ein at ein presterer på det øvste nivået i verda, legg ho til.

Terland møter NRK på Carrington, United sitt nyoppussa treningsanlegg.

På onsdag tar ho og United i mot Vålerenga til ligaspelet i Meisterligaen.

– Det er jo ei turnering ein har lyst til å gjere det bra i. Eg har drøymt om å spele Meisterligaen heile mitt liv.

«Kanskje det er noko i vatnet?»

24-åringen briljerte då Manchester United møtte Brann i siste kvalifiseringskamp til Meisterligaen. United vann 3–0 og Terland stod for alle måla.

– Ho er veldig, veldig fokusert. Nesten på eit intenst nivå, seier United-trenar Marc Skinner.

Han blir stadig imponert over den norske kvinna, og har tidlegare samanlikna ho med ein annan nordmann: Erling Braut Haaland.

– Inne i feltet finst det ingen som er betre til å avslutte.

Skin meiner Terland og Haaland har mange av dei same kvalitetane på fotballbanen.

– Det er noko med tankegangen til spelarane. Kanskje det er noko i vatnet? Eller noko frå området? legg han til.

Trenaren har akkurat fått opplyst at Terland og Haaland er frå Bryne begge to, og at det berre er eitt år mellom dei.

• Kampen mellom Manchester United og Vålerenga kan du følgje klokka 20.50 på NRK TV og NRK Sport på radio.

Same spelemåte

Også NRKs fotballekspert Carl-Erik Torp ser samanlikninga.

– Det er fleire ting ein kan peike konkret på som gjer dei like. Eg trur spesielt på det mentale.

Han listar opp:

– Det dyriske instinktet til Haaland: nase for mål, avslutningsferdigheitene, at han kjem i skåringsposisjonar, og les kor ballen dett ned. Desse tinga har Terland, spesielt det siste året, lært mykje av Haaland og blitt ganske lik, seier Torp.

Han held fram:

– Dei er avslappa, kule folk utanfor banen, som også er utruleg fokuserte på arbeidsoppgåvene som står framfor dei.

Torp meiner også å sjå fellestrekk i avslutningsferdigheitene deira.

Vil bli verdas beste spiss

– Eg synest jo det er dritkult, og det er jo berre å dra mykje motivasjon av det. Og det inspirerer meg eigentleg veldig mykje, så eg tar jo berre det som eit kjempekompliment, seier Terland om å bli samanlikna med City-spissen.

Ho fortset:

– Begge to er fysiske spissar som er gode til å skåre mål. Det han driv med, er heilt ekstremt. Ein strevar mot å kunne prestere slik heile vegen, sjølv òg. Vi spelar jo litt på same spelemåte.

United-spissen, som har blitt kåra til månadens beste spelar i klubben, trur ho kan nå langt.

– Eg føler jo at eg har i meg å bli den beste spissen i verda, slik som det er i verda no, seier ho.

– Eg er ikkje kjempeung, men eg er framleis ung nok til å kunne ta ein del store steg i løpet av dei neste åra, seier 24-åringen.