– Bilane blir smartare, men vi bulkar meir

– Folk stoler meir blindt på bilen, seier Kristoffer Nevland.

Han jobbar hos Nevlands Bil og Karosseri AS i Stavanger.

Bilverkstaden har ikkje statistikk, men han trur at om lag halvparten av skadane dei reparerer, har ulike sensorar i bilen som ingrediens.

Merksemd hos ein bilførar er viktig for at ulukker ikkje skal skje, men det er ikkje det denne saka handlar mest om.

Men ryggekamera. Avstandsfølar. Blindsone-sensor.

Moderne bilar vil hjelpe deg å køyre, men det er ikkje alltid dei hjelper deg med alt du ventar at dei skal hjelpe deg med.

– Kunden kan seie: «Eg såg ikkje den på kameraet», seier Nevland.

Smartare bil = meir bulking

I Haugesund er sensorane trekt fram som ei forklaring på dei lange ventelistene hos ein verkstad, ifølge Haugesunds Avis.

Norges Bilbransjeforbund (NBF), som har verkstader over heile Noreg som medlemmar, har heller ikkje tal. Men for NBF er det «ein kjent diskusjon».

Også for forsikringsselskapet Fremtind er det kjent. Saman med Sintef, Nord universitet og Trygg Trafikk står dei bak ein rapport om korleis skjermane i bilen kan stele merksemda di.

Sjølv om forskinga ikkje handla om korleis bilane kan hjelpe føraren, stadfester Fremtind at det er fleire skadar knytte til sensorar nå.

– Det er jo eit paradoks at bilane våre blir smartare og smartare. Men vi bulkar jo stadig meir, seier Therese Hofstad-Nielsen, som er skadeførebyggar i Fremtind.

Heller ikkje dei veit akkurat kor mange saker dei har i løpet av eit år kor sensoren ikkje har gitt føraren den informasjonen hen venta. Hofstad-Nielsen peiker også på alle skadane som sensorane hjelper til at ikkje skjer.

Og at det til sjuande og sist er ditt ansvar. Ikkje bilen sitt.

– Viss det til dømes har vore mykje snø, fungerer kanskje ikkje sensorane like godt. Dei er meint som ei støtte, men vi kan ikkje overlate alt ansvaret til dei, seier ho.

Trygg Trafikk: – Viktig utstyr

Storebrand og Gjensidige ser det same som bilbransjen og Fremtind. Det gjer også If. Pressesjef Sigmund Clementz har vore opptatt av «det automatiske» i fleire år.

– Dei er hjelpemiddel. Dei erstattar ikkje ditt ansvar som bilførar etter vegtrafikklova og køyretøyforskrifta. Dei viktigaste sensorane som er i bilen, er dine sansar, slår han fast.

Statens vegvesen peika i fjor på at teknologi medverkar til fleire ulukker. Så ein skulle kanskje tru at ein organisasjon som Trygg Trafikk ville ha færre, ikkje fleire, sensorar i bilane.

Organisasjonen seier talet på bilskadar går opp, særleg på nyare bilar. Men fagsjef for trafikksikkerheit, Bård Morten Johansen, vil ikkje skru dei av.

– Det meste av utstyret er viktig for oss. Vi har førebels litt for kort erfaring til å gi noko godt bilde av kva det betyr, men dei fleste eksempla på førarstøtte er berre positivt, seier han.

På bilverkstaden i Stavanger veit ikkje Kristoffer Nevland kva han helst ville forandra på viss han fekk bestemme. Bilane eller førarane.

Sjølv hadde han som bilførar ikkje turt å stole på 360-graders kamera eller bilar utan speglar (dei finst, ifølge Nevland).

– Dette er brukarfeil. Eg trur mange har gløymd det dei ein gong kunne, seier han.