Vil stramme reglane – kan bli 15-årsaldersgrense

Ulukkestala for elsparkesyklar har dobla seg i Oslo.

Politiet har tidlegare slått alarm om barn og unge som trimmar elsparkesyklar til over 100 kilometer i timen.

No varslar regjeringa nye grep.

– Vi har jobba med å regulere dette feltet over lang tid, men vi ser at det er ei bekymringsfull ulukkesstatistikk no, seier samferdselsminister Jon-Ivar Nygård (Ap).

Ønsker lokale tilpassingar

Eit sentralt tiltak er å greie ut om aldersgrensa bør hevast frå 12 til 15 år.

– Vi ser at 13-, 14- og 15 åringar skil seg ganske mykje ut i ulukkesstatistikken. Det betyr at kanskje at umodenskapen til yngre menneske har ei betydning, seier Nygård.

I tillegg vil regjeringa gi kommunane handlingsrom til å forby køyring på fortau, og stoppe sal av elsparkesyklar som går raskare enn det som er lov i Noreg.

– Vi håpar å oppnå at vi får ned ulukkestal og at det blir tryggare for alle, både elsparkesyklar og dei som ferdar saman med dei i trafikken, seier Nygård.

Kamzy Gunaratnam (Ap), fyrste nestleiar i transportkomiteen, peikar på at Stortinget behandlar eit forslag om å gi kommunane fleire verktøy til å regulere elsparkesyklar.

– Det er store forskjellar mellom by og land, og lokale tilpassingar må til for å sikre tryggleik, seier Gunaratnam.

Aldersgrensa påpeikar ho, blir vurdert av staten.

Skadelegevakta: – Det er ikkje eit leiketøy

Ved Oslo skadelegevakt ønsker dei innstrammingane velkomen.

Lege Henrik Siverts, meiner tiltaka kan vere avgjerande for å redusere talet på skadar.

– Det er ikkje eit leiketøy dette. Det er bra å få bort dei unge frå trafikken, seier han, og peikar på at elsparkesykkelen er eit motorisert køyretøy som krev modenskap.

Ifølge Siverts har 55 15-åringar skada seg fram til oktober i år, og gruppa 13–15 år er godt representert i statistikken.

Totalt har skadelegevakta behandla 6800 elsparkesykkelskadar sidan 2019.

– Vi ser 5–6 prosent alvorlege skadar, med hovudskadar, blødingar og brot som kan gi varige men. Nokre må rehabiliterast på Sunnaas, og vi har hatt om lag tolv dødsfall i Noreg, seier han.

Han håpar også hjelmpåbod blir vurdert, og åtvarar mot å opne for nattekøyring igjen.

– Då vi hadde det i 2021, måtte vi ha ekstra bemanning på natta. Det var heilt ekstremt, seier han.

Siverts meiner det er fornuftig å gi kommunane høve til å forby køyring på fortau.

– Vi har registrert minst 70 påkøyrslar på fortau i Oslo så langt i år. Det er fornuftig å tenke det her i Oslo, men kanskje ikkje over alt, seier han.

Trygg Trafikk ønsker at aldersgrensa blir heva.

– Det viktigaste, meiner vi, er å heve aldersgrensa. Tolvåringar kan i dag køyre heilt lovleg på elsparkesyklar som går opptil 20 kilometer i timen, og mange av dei er enkle å trimme, seier pressesjef Christoffer Solstad Steen.

Han meiner hjelmpåbod burde vore med i pakka, og kallar det eit enkelt og rimeleg tiltak for å redusere hovudskadar.

Folk på gata er delte

Blant forbipasserande i Oslo er synspunkta ulike, men mange støttar strengare reglar.

– Å forby å køyre på fortauet tenker eg er veldig greitt. Sykkel høyrer til på vegen eller i sykkelfeltet, seier Tuva Eikebrokk.

Ho jobbar på sjukehus og ser mange ulukker med elsparkesyklar.

Eikebrokk meiner det er smart å heve aldersgrensa, men synest elsparkesyklar er eit fint framkomstmiddel.

– Det kan bli farleg når folk køyrer gjennom folkemengder og ut i vegbanen. Det kan vere greitt med eigne vegar, seier Petter Aalstad om innstramminga av reglane for elsparkesyklar.

Kompisen hans, Christian Sørskog-Mørkhaugen, meiner heving av aldersgrensa kan vere eit viktig grep.

– Når du er 15, så er du eldre enn 12, så det kan kanskje vere greitt. Ein måte å redusere skadar og gjere det tryggare i trafikken.

Helge Rosenberg støttar innstrammingane.

Han peikar på at trafikkbiletet er krevjande, særleg når folk køyrer over fotgjengarovergangar og på fortau.

Rosenberg bur i Bærum og opplever at syklane ofte står parkert overalt, og at mange køyrer for fort, noko som skapar problem for både barnevogn og eldre.

– Det viktigaste er å få slutt på køyring på fortau og sørge for betre parkering slik at folk kjem fram.