Trump: Kjenner ikkje til at journalist blei lagt til i angreps-chat

Måndag kveld seier Donald Trump seier han «ikkje veit noko om» at ein journalist blei lagt til i ein gruppechat om krigsplanlegging.

På spørsmål om avsløringa svarte Trump «du fortel meg om det for fyrste gong».

Tidlegare på kvelden bekrefta Det kvite hus at dei ved ein feil blei inkludert i ei tekstgruppe der USAs forsvarsminister Pete Hegseth og andre planla eit angrep i Jemen. Det melder nyheitsbyrået AFP.

Det var sjefredaktør Jeffrey Goldberg i avisa The Atlantic som sjølv avslørte at han ved ein feil blei lagt til i ein gruppechat på med fleire høgtståande politikarar i Trump-administrasjonen.

Ein gruppechat for angrep mot Houthiane

– Leiarar for USAs nasjonale tryggleik inkluderte meg i ein gruppechat om dei kommande militære angrepa i Jemen, skreiv Goldberg.

Goldberg fortel vidare at det var nokre dagar etter at han hadde blitt lagt til i gruppa at han fekk meldingane om det planlagde angrepet.

Temaet for gruppechatten var eit planlagt angrep mot Houthiane i Jemen 15. mars i år.

Visepresident J.D. Vance, forsvarsminister Pete Hegseth og nasjonal sikkerheitsrådgivar Michael Waltz var nokre av medlemmene som skreiv meldingar i chatten.

Det skal ha vore til saman 18 medlemmar i gruppa.

Sjefredaktøren skildrar korleis ein konto med namnet «Pete Hegseth» oppdaterte dei andre medlemmane i gruppa med detaljert informasjon om kva slags våpen som skulle bli nytta når det skulle skje og kva for mål som skulle bli råka.

– Eg trudde ikkje det kunne stemme. Så begynte bombene å falle, fortel Goldberg.

Samtalen gjekk føre seg på plattforma Signal, som er ei kryptert meldingsteneste.

Golberg meiner at informasjonen han fekk tilgang til potensielt kunne ha blitt brukt til å skade amerikansk etterretningspersonell, viss den hadde hamna i feil hender.

No svarar amerikanske styremakter på avsløringa.

– Vi gjennomgår korleis eit tilfeldig nummer blei lagt til i kjeda, sei Brian Hughes, talsmann for det nasjonale tryggingsrådet, melder AFP.

Følg nyheiter frå USA her:

Forskar: Frykt for lekkasje kan føre til tilbakehald av viktig informasjon frå presidenten

– Frykt for at sensitiv informasjon kjem på avvegar kan føre til at både USAs eige, og dessutan forsvars- og etterretningsmiljøet til allierte, held tilbake sensitiv informasjon frå dei politiske avgjerdstakarane.

Det skriv Hilmar Mjelde i ei tekstmelding til NRK. Han er professor i statsvitskap ved Høgskulen på Vestlandet, og har forska mykje på amerikansk politikk.

Viss ei slik frykt spreier seg, kan det få store konsekvensar, ifølge Mjelde.

– Det kan i verste fall føre til at presidenten ikkje får all den informasjonen han treng for å ta avgjerder om nasjonal sikkerheit.

Forskaren meiner at skepsisen til å utnemne nybegynnarar som Pete Hegseth og Tulsi Gabbard til topposisjonar har dreidd seg om nettopp frykt for korleis dei ville handtere sensitiv informasjon.

Fleire kongressmedlemmar skal vere opprørte

Ifølgje Axios, har kongressmedlemmar frå både republikanarane og demokratane reagert sterkt på avsløringa.

Den republikanske senatoren, John Cornyn er ein av dei som har reagert sterkt på hendinga.

– Det høyrest ut som ein stor tabbe, sa han ifølgje CNN.

– Eg håpar at dei ulike etatane vil sjå på dette. Det høyrest ut som nokon har svikta, la han til.

Nokre demokratar har allereie bedd om etterforsking av dei involverte.

– Dette er eit opprørande brot på nasjonal tryggleik, og nokon bør stillast til ansvar, uttala den demokratiske kongressmannen, Chris Deluzio til Axios.

Deluzio som er medlem av Forsvarskomiteen, la til:

– Vi treng ei fullstendig etterforsking og høyring om dette i House Armed Services Committee, så snart som mogleg.

Interessert i meir utanriks? Lytt til utanriksredaksjonen sin podkast: