Trekte seg frå MGP – vil ikkje stå på same scene som Israel

Bård og Vegard Ylvisåker har hatt ei suksesskarriere sidan tidleg på 2000-talet.

Fleire i Melodi Grand Prix-miljøet har tippa at dei ville delta i årets konkurranse, men slik blir det altså ikkje.

Det er Ylvis sjølv som melder dette på Instagram fredag. Der skriv dei blant anna:

– I år var planen vår å delta i MGP. Vi hadde laga ein låt og eit konsept vi tenkte kunne passe bra perfekt i MGP-samanheng, skriv Ylvis fredag ettermiddag.

Sa frå seg plassen

Dei viser til at dei gjorde det klart for NRK tidleg i prosessen at dei ikkje ønska å stå på same scene som Israel.

Dei hadde håpa at EBU ville utestenge Israel frå Eurovision.

– Då det i desember blei klart at dette ikkje ville skje, såg vi ingen andre moglegheiter enn å seie frå oss plassen i årets konkurranse, skriv Ylvis.

Prosjektleiar for MGP i NRK, Mads Tørklep, bekreftar at dialogen har funne stad, men avdramatiserer situasjonen.

– Vi jobba med gutane med ein intensjon om at dei skulle delta, men landa aldri noka avtale og gjekk kvar til vårt tidleg i desember, seier Tørklep.

Lansering måndag

Han legg til at dette er ein del av gamet i bransjen.

– Dette skjer frå tid til anna. Vi håpar vi kan ta opp att samtalane ein annan gong.

Sjølv om avtalen meds Ylvis ikkje gjekk i boks denne gongen, ser Tørklep lyst på den kommande artistlanseringa.

Neste veke skal sløret lettast for årets deltakarar.

– No gler vi oss til å vise fram eit vilt bra lag med artistar neste veke. Totalt 16 namn skal presenterast i løpet av måndag og tysdag, seier Tørklep.

Lanseringa blir sendt direkte i NRK TV og på NRK.no.

Rosar musikksjefen

Tørklep nyttar høvet til å skryte av arbeidet til MGP sin framleis ferske musikksjef, Tarjei Strøm.

– Det er eit skyhøgt nivå. Der er det både unge nykommarar og store verdsstjerner som skal ta Noreg med storm denne vinteren.

Det har vore mykje diskusjon både her i landet og internasjonalt om at Israel skal delta i årets Eurovision.

Årets finale i MGP blir halden i Håkonshall på Lillehammer laurdag 28. februar og Mads Tørklep lovar eit storslått show – også utan Ylvis.