Strand Larsen med tiande ligascoring: – Har overraska meg

Jørgen Strand Larsen blei nok ein gong matchvinnar for Wolverhampton då dei vann 1–0 mot West Ham.

– At han skulle bli ein god og veldig nyttig spelar for Wolverhampton var eg ganske trygg på, men at han skulle nå tosifra antal mål allereie denne sesongen har overraska meg, seier NRKs fotballekspert Kristoffer Løkberg.

– Han har levert over mine forventingar, og eg synest han har levert gode saker. Med litt meir marginar kunne han og hatt litt fleire mål, seier fotballekspert i Viaplay, Nils Johan Semb, til NRK

Det var dårlege nyheiter for Noreg da Manchester City stadfesta at Erling Braut Haaland er ute til slutten av sesongen, etter skaden han fekk mot Bournemouth på søndag.

Noregs skjebnekamp 6. juni mot Italia kan derfor vere i fare.

Den gode nyheita er at Jørgen Strand Larsen er i kanonform.

– Godt å vite at Noreg har han i bakhand, viss det skulle vise seg at Haaland ikkje blir skikkeleg klar til Italia-kampen, seier Løkberg.

Debutsesong

Scoringa mot West Ham var spissens tiande ligamål for Wolverhampton. Nordmannen tok imot ballen utanfor boksen og klemte til med venstrefoten. Ballen gjekk mot mål og tok ein liten styring frå ein West Ham-spelar på vegen.

– Eg er mektig imponert. Tosifra antal mål for eit lag i botn av tabellen i debutsesongen, og framleis åtte kampar igjen å spele er ein prestasjon langt over forventing. Han nyt stor respekt i Premier League, seier Semb.

I målfeiringa heldt Strand Larsen opp ti fingrar for å markere hans tiande ligascoring i debutsesongen, etter overgangen frå spanske Celta Vigo, der han scora 13 ligamål førre sesong.

– Ti mål i Premier League for dette Wolves-laget er rett og slett ein kjempeprestasjon, og det står ennå att åtte kampar denne sesongen. Når dette i tillegg er Strand Larsens første sesong i Premier League, gjer det prestasjonen berre enda sterkare, seier den tidlegare Viking-spelaren.

Meiner han bør bli verande

Wolves har slite denne sesongen og ligg på 17. plass på tabellen, men har no heile 12 poeng ned til Ipswich på nedrykksplassen nedanfor.

– Eg trur han vil ha svært godt av å bli verande i Wolves, med den tryggleiken og tilliten det vil medføre, men han har med denne sesongens prestasjonar sikra seg ein lang og fin Premier League-karriere, viss ønskeleg, seier Løkberg.

Statistikk-nettsida OptaJoe melder at berre Raúl Jiménez i 2019 har scora meir for Wolverhampton i ein debutsesong. Mexicanaren, som no er i Fulham scora 13 ligamål den sesongen.

– Dei elskar spissar som har bevist at dei kan score mål i Premier League der borte. Han vil stå høgt på ein del klubbar si ønskeliste i framtida, spår Løkberg.

Den tidlegare landslagssjefen er einig med ekspertkollegaen.

– Han blir følgt med på, men eg trur det blir ein sesong til i Wolverhampton. Så blir det spennande å følgje med på om han klarer å følgje opp ein slik debutsesong. Då må han halde seg skadefri og spele jamt og trutt, seier Semb.

Det er berre elleve spelarar som har scora fleire mål i den engelske ligaen denne sesongen. Mohamed Salah tronar på toppen med utrulege 27 scoringar, på plassen bak han ligg Haaland med 21 scoringar.