Solbakken innrømmer tabbe – men NRK-ekspert meiner det har hjelpt Noreg

Då Israel utlikna mot Noreg litt ut i andre omgang, var det fleire norske supporterar som begynte å bli nervøse.

Landslaget har nemleg mange gonger før rota vekk tre poeng i kampar der dei hadde full kontroll, og akkurat då såg Israel-kampen ut til å bli endå ein reprise.

Noreg kunne leia med både to og tre mål. I staden slo motstandaren til.

Men der landslaget tidlegare hadde kollapsa eit av ein sånn smell, vakna «nye» Noreg.

Med to kjappe scoringar sette dei spikaren i kista.

– Det viser at vi har tatt steg. Vi har blitt meir vaksne og blitt betre. Det er herleg å sjå, seier landslagskaptein Martin Ødegaard til NRK.

– Det er sikkert ikkje mange år sidan vi kanskje hadde falle av litt der når vi fekk den i fleisen. Men i dag kjente eg at sjølv når dei scorar, så ser eg rundt meg – og alle er klare og rolege og veit at vi kjem til å skape mykje vidare. Vi held på roa og held fram med å male på og straffe dei. Og vi gjer ein svært solid kamp, seier Ødegaard.

– La lista for høgt

På spørsmål om kva som har endra seg frå landslagstroppen han tok over, til landslaget han styrer i dag, peikar landslagssjef Ståle Solbakken først på at dei har blitt meir modne.

– Og kanskje eg gjorde ein feil ved at eg la lista for høgt i starten. Altså at vi spelar den fotballen som eg ønsker at vi skal spele.

– På kva måte la du lista høgt?

– Nei, kanskje når det gjeld kva vi gjorde mot etablert forsvar. Der la vi kanskje lista litt for høgt, seier Solbakken.

NRKs fotballekspert Kristoffer trur den moglege feilen har hjelpt Noreg.

– Eg forstår kva han meiner. Han la tidleg opp til eit ganske avansert og krevjande angrepsspel. Og det førte til svakare resultat enn om han var meir pragmatisk og hadde spelt enklare. Kanskje får vi igjen litt for det no, at det har lønt seg på lang sikt, seier Løkberg.

– Er du einig i det, spør VG Alexander Sørloth.

– Tja, innleier stjernespissen.

– Altså, då Ståle tok over så blei det ei lita sånn overhaling. Det var mange som gjekk ut og så kom mange nye inn. Dei har fått tid no og blitt meir erfarne. Det kan tynge å spele med flagget på brystet. Du representerer landet ditt og det er eit anna press enn på klubblaga, og det verkar som fleire har blitt vant til det.

Tatt litt lenger tid enn folk trudde

Spissen, som tangerte Ole Gunnar Solskjær og Tore André Flo med det 23. landsslagsmålet sitt mot Israel, er tydeleg på at det har vore ei stor endring i laget.

– Før kunne det vere litt at vi såg ned i bakken og var nedbrotne etter at vi fekk oss ein trykk. No har vi nasen opp, vi har kassa framme. Du ser at den «go»-ein i laget er annleis enn før.

– Klarer du å identifisere når de klarte å snu det?

– Etter at vi gjekk på den smellen mot Austerrike (tapte 5–1 i fjor haust), så synest eg det var veldig sterkt at vi reiste oss såpass som vi gjorde samlinga etterpå. Så det er definitivt ein faktor. Så har vi blitt eldre, sjølv om vi framleis har eit ungt lag. Vi har vore på ei høgt nivå i lenger tid, og eg synest også breidda i stallen er veldig god.

Stoppar Kristoffer Ajer meiner spelarane no endeleg klarer å levere det sjefen ønsker ute på bana.

– Han er veldig tydeleg i det han vil ha, og no klarer vi endeleg å vise den fotballen. Det er eg veldig glad for, seier Ajer.

Patrick Berg har vore med gjennom store delar av Solbakkens periode, også då jobben var trua etter 5-1-tapet mot Austerrike i fjor.

Han innrømmer at det har tatt lenger tid enn venta å snu dei vonde resultata som kom med jamne mellomrom.

– Vi har stått bak han heile vegen og hatt veldig tru på prosjektet. Så har det kanskje tatt litt lenger tid enn folk trudde å skape eit stabilt og robust landslag. For det har vore mange år der Noreg ikkje har vore det. Det kjennest veldig godt no å kjenne at vi har den tryggleiken i gruppa.