Sofias drøm om USA knust

Sofia Mendez (15) og mora Denia (32) ser sjokkerte på meldinga dei har fått frå USAs grensestyremakter: Avtalen dei har venta på i 13 månader, er kansellert.

Familien flykta frå vald og fattigdom i Honduras. Gleda var enorm då dei fekk sikra seg ein avtale på grensa til USA. Endeleg skulle draumen om USA bli oppfylt.

Fjerna grenseprogram

Avtalen fekk dei via ein app, CPB One. Appen gjorde det mogleg for innvandrarar å søke om å lovleg krysse grensa frå Mexico til USA.

Appen fungere som eit slags online lotterisystem der 1450 personar dagleg fekk avtalar om å møte ved ein offisiell grenseovergang for å søke om asyl. Dersom dei slapp gjennom ei første vurdering, fekk dei komme inn i USA, med løyve til å jobbe, mens dei venta på at asylsøknaden blei behandla.

Rundt ein million menneske har slept inn i USA på denne måten, ifølge amerikanske medium.

VENTAR: Denia Mendez saman med borna Sofia og Isai (13). Foto: Cheney Orr / Reuters / NTB

Tilhengarar av appen seier den bringa orden til ein kaotisk grensesituasjon. Kritikarane meinte derimot at den fungerte som ein magnet som trakk fleire migrantar til grensa.

Denne digitale plattforma var ein sentral del av forgjengar Joe Bidens grensestrategi, som viste til at dei ulovlege grensepasseringane minka kraftig etter at appen kom i bruk.

Vil gå rettens veg

Dagleg logga rundt 280 000 menneske seg på appen i eit håp om å bli blant dei utvalde som fekk ein avtale på grensa.

Men berre minutt etter at Donald Trump blei innsett som president måndag, slutta appen å fungere.

Det er ikkje lenger mogleg å søke om avtalar for å krysse grensa. I tillegg blei alle eksisterande avtalar kansellerte.

NEKTAR Å GI OPP: Mange håpefulle møter likevel opp ved grenseovergangane, her ved El Chaparral i Tijuna, Mexico. Foto: Jorge Duenes / Reuters / NTB

I dei mange flyktningleirane på mexicansk side av grensa, slo vedtaket ned som ei bombe, særleg for dei som allereie hadde fått ein avtale.

Det er varsla at stenginga av programmet vil bli prøvd for retten. Borgarrettsorganisasjonen The American Civil Liberties Union seier Trump no har fjerna den einaste måten for flyktningar å søke om asyl på grensa mellom Mexico og USA.

Usikker framtid

Men framtida til Sofia og familien er usikker. Trump gjeninnfører praksisen med «remain in Mexico», som viser til at alle asylsøkarar må vente i Mexico på å få søknadane behandla. Trump innførte praksisen i førre periode, men den blei oppheva av Joe Biden.

President Donald Trump har erklært nasjonal krise på grensa, og stenginga av appen er berre eit av fleire tiltak han har innført for å stanse innvandringa.

TRØST: Sofia (15) får trøst av mamma Denia etter at dei blei nekta å reise inn til USA. Foto: Cheney Orr / Reuters / NTB

Sofia frå Honduras trykker iherdig på appen i håp om at den likevel skal fungere. Mora ser på dottera med tårevåte auge.

– Dei kjem ikkje til å gi deg tilgang til appen, vesle venn, trøystar ho.

Men Sofia held fram med å forsøke. For no anar ikkje familien kva anna dei kan gjere.