Skogfinnane føler seg gløymde: – Veldig leit

– Eg synest det er veldig leit. Det ekskluderer mange av dei nasjonale minoritetane vi har, seier Marikken Bruvold.

Ho er leiar i Unge Skogfinnar i Noreg – Norjan Metsäsuomalaisnuoret, og meiner politikaranes uvitande gjer vondt.

Førre veke skapte eit vedtak i landsmøtet til KrF reaksjonar.

Vekk med pride-flagget, berre det norske, samiske og kvenske flagget skal vere tillate i norske skulegardar.

Men Noreg har fleire nasjonale minoritetar.

Og skogfinnane krev no svar på kvifor deira flagg ikkje vart inkludert.

• Kva kan du om skogfinnane? Test deg sjølv her!

– Forskjellsbehandling

Bruvold synest heile vedtaket til KrF er skuffande, og eit bevis på kor lite folk veit om skogfinnane.

– Undersøkingar viser at skogfinnane er den minst synlege minoriteten av alle, hevdar Bruvold, og legg til:

– Dette gjer oss enda mindre synlege.

Organisasjonen Skogfinske Interesser i Noreg har sendt eit brev til sentralstyret i KrF.

I brevet skriv dei at det er behov for klargjering av haldningane partiet har til dei nasjonale minoritetane, og spør kvifor dei er behandla ulikt.

Styreleiar i Skogfinske interesser i Noreg, Terje Audun Bredvold, er spent på kva KrF kjem til å svare.

– Dei har jo gjort eit val der dei gjer forskjell på ein nasjonal minoritet frå dei andre. Korleis dei skal grunngi det, er eg spent på, Bredvold.

– Det jo forskjellsbehandling, og det er merkeleg.

Av dei fem nasjonale minoritetane i Noreg, er det fleire av dei som har eige flagg.

Bredvold seier det var sårt å sjå at Skogfinnane vart gløymd som nasjonal minoritet.

– Det er eit signal om at vi aldri kan slappe av i dette arbeidet. Vi må framleis kjempe.

• For to år sidan, 4. mai 2023, vart det skogfinske flagget heist offentleg for første gong.

– Ikkje meininga

Generalsekretær i KrF, Ingunn Ulfsten, skriv i ein SMS til NRK at dei fekk brevet rett før helga.

– Vi jobbar med eit svar. Skogfinnane sine rettar er viktige for oss, og vi set pris på deira engasjement, skriv ho.

Det var ungdomslaget KrFU som kom med forslaget.

– Det var ikkje meininga å stenge ute skogfinnane, seier Ingrid Olina Hovland, generalsekretær i KrFU.

Ho seier til NRK at dersom vedtaket blir politisk realitet, vil dei sjølvsagt inkludere alle dei nasjonale minoritetane, også skogfinnane.

– Hensikta med forslaget er at det ikkje skal henge politiske eller ideologiske flagg i skulegarden.

• Det skogfinske flagget skal gje identitet, og auke samhaldet og tilhøyrsla.

– Start med pensum

Leiaren i Unge skogfinnar meiner vi må kunne ha høgare forventningar til at politikarar har kjennskap til kva for nasjonale minoritetar vi har i Noreg.

Særleg dei som sit på Stortinget burde vite dette, meiner ho.

– At dei har gløymd oss, seier jo litt om kor lite synlege vi er som minoritet, seier Bruvold.

– Det er jo veldig leit, særleg no som vi har fått ganske mykje merksemd etter rapporten frå sannings- og forsoningskommisjonen, som også har vore oppe i Stortinget, seier ho.

For snart to år sidan la sannings- og forsoningskommisjonen fram ein rapport etter å ha granska konsekvensane av fornorskingspolitikken og urett ovanfor samane og nasjonale minoritetar.

Kommisjonen slo fast at kunnskap om skogfinnar, samar og kvenar er svært mangelfull blant befolkninga i Noreg.

• Les også om den historiske unnskyldninga som kom frå Stortinget i fjor.

Dei meinte auka kunnskap kan redusere diskriminering og hets av desse gruppene.

Bruvold meiner politikarane i KrF no må setje seg inn i kva nasjonale minoritetar som finst i Noreg.

– Eg veit ikkje kva dei har lært på skulen, men det er tydeleg at dei ikkje har lært om oss, seier ho.

• Høyr podkasten om mannen som gjekk til ein foss i Finnskogen for å selje sjela si til djevelen. Framleis skjer det rare ting der: