Skogbrann på Kreta: 400 norske turistar i nærleiken

– Helikoptera flyg over her no og prøvar å avgrense brannen, fortel Trond Hågensen til NRK.

– Det er så mange ferieturistar her, og alle står på gata.

Hågensen seier brannen starta ved ein Lidl-butikk, men spreidde seg til terreng like ved.

– Det var vanvitig med røyk. Politiet står her med munnbind på seg og dirigerer trafikken.

Eva Henriette Trondsen på staden fortel NRK at ho stod i dusjen då ho oppdaga at det brann rett utanfor rommet på hotellet Castle Suites.

– Det var pappa som ringe og sa at eg måtte kome meg ut. Vi har evakuert oss sjølve, kan du seie.

Dei har fått med seg nokre eigendelar, men sprong ut i all hast, seier ho vidare.

– Vi veit ingenting. Ingen har sagt noko til oss.

Ving og Apollo evakuerer

103 kundar ved Apollo er råka, seier pressekontakt Linn Granvoll til NRK. Dei er no i ferd med å bli evakuerte.

Landssjef i Ving Norge, Marie-Anne Zachrisson, seier at dei har 155 kundar på tre hotell i området. Desse er no evakuerte og står på gata, seier ho vidare.

– Sjølve brannen har oppstått ved ein Lidl-butikk. Difor har vi prata med kundar som er råka, fortel Zachrisson i Ving Norge.

Zachrisson fortel at gjestane framleis står ute på gata med bagasjen sin, men at dei har guidar på plass på dei tre hotella som held eit auge med situasjonen.

– Vi er også førebudde med bussar dersom det blir snakk om å flytte dei frå hotella.

– Er det fare for at brannen skal spreie seg? Er det difor dei blir evakuerte?

– Det kan eg ikkje uttale meg om. Vi følger alltid det som lokale styresmakter ber oss om, og råda som dei kjem med. Der må vi følge med på utviklinga heile vegen, og det gjer vi tett.

TUI: Ser ut til at brannmannskapa har kontroll

TUI opplyser også at dei har gjestar i nærleiken av skogbrannen, men at fleire av desse har fått beskjed om å gå tilbake på hotellet.

– Det eg kan fortelje no er at vi har om lag 150 norske gjestar i Platanias-området for augneblikket, og at vi følger situasjonen som føregår der tett, seier kommunikasjonssjef Anne Mørk-Løwengreen.

– I dei meldingane vi har fått står det at ein byrjar å få kontroll på skogbrannen, men det er noko som kan endre seg. Då vil vi også kaste oss raskt rundt.

TUI har sendt ut beskjed til dei det gjeld på melding og i kundeappen, og er klare til å evakuere folk til andre område dersom det blir behov for det.

Merkast også lenger vekke

Brannen merkast fleire kilometer unna, fortel Jan Ole Vesterlid frå Ålesund. Han har vore på Kreta i snart to veker.

– Det var så tett røyk at eg måtte gå inn. Det var ubehageleg å vere ute på verandaen, fortel han.

– Dei hentar vatn for å sløkkje brannen.