Sitat vekker oppsikt etter sjokktap: – Signerer på eiga oppseiing

– Det høyrest jo nesten ut som ein trenar som signerer på eiga oppseiing rett etter kampen.

Det sa NRKs fotballekspert Kristoffer Løkberg då han blei servert sitata til Manchester United trenar Rúben Amorims etter tapet mot Grimsby.

Samtidig trekker Løkberg fram at dette er sagt i «enorm skuffelse» rett etter kampslutt.

For etter at United tapte på straffer og gjekk på det første tapet til klubben mot eit lag på nivå fire, sa portugisaren blant anna følgande til engelsk presse:

– Av og til har eg lyst til å seie opp jobben

På pressekonferansen fredag, før Uniteds neste Premier League-kamp mot Burnley laurdag, innrømte Amorim at kjenslene ofte er utanpå kroppen hans.

– For å vere ærleg med dykk: Kvar gong vi har eit slikt tap, så vil eg vere slik. Eg pleier å seie at ... Av og til hatar eg spelarane mine, andre gonger elskar eg dei. Av og til vil eg også forsvare dei. Dette er måten eg er på, slik vil eg nok, dessverre, også fortsette å vere. I akkurat den augeblinken var eg frustrert og forbanna, seier Amorim.

• Du kan følge kampen mellom Manchester United og Burnley frå klokka 16.00 her.

Viaplays fotballekspert Lars Tjærnås er ikkje overraska:

– Dette er jo sånn Amorim er – dønn open om kjensler etter kampar, gjerne utan det filteret mange andre managerar har. Eg tenker det er uklokt å vere såpass open for tolking etter ein sånn prestasjon og det resultatet. Som manager sel du mykje, men først og fremst tillit til leiarskapet ditt og ideane dine, seier Tjærnås og legg til:

– Både internt og utanfor kan dette gi ei klar kjensle av ein manager i villreie. Og det når behovet er som størst for å sjå ein manager som peikar ut ei klar retning, tar leiing og fortel at han trur på vegen vidare. Dei treng ingen tvilar nå, dei treng ein sterk leiar.

Samtidig som Amorim er open på at han er ein trenar med spontane og ærlege utbrot, så innrømmer han at det av og til kan gå over stokk og stein.

– Av og til har eg lyst til å seie opp jobben her, andre gonger vil eg vere her for 20 år. Av og til elskar eg å vere med spelarane mine, mens andre gonger vil eg ikkje vere i nærleiken av dei. Desse svingingane må eg bli betre på å takle, det kjem til å bli vanskeleg, men nå fokuserer eg på den neste kampen, seier Amorim.

– Veldig spesielt

Dette er heller ikkje første gong Amorim seier noko liknande som dette etter det sjokkerande Grimsby-tapet onsdag:

Etter tapet i Europaliga-finalen mot Tottenham i mai, uttalte 40-åringen:

«Eg er alltid open: Dersom styret og supporterane ikkje meiner eg er den rette mannen, vil eg forlate klubben i morgon. Men eg vil ikkje trekke meg – eg har trua på meg sjølv i denne jobben».

Ansvarleg redaktør i United.no, Dag Langerød skreiv i ein kommentator torsdag at «det høyrdest ut som Amorim gav opp» etter kampen onsdag.

– Det er veldig spesielt. Å sitte og høyre på ein United -manager snakke på den måten, seier Langerød og legg til:

– Det er ikkje heilt topp dersom den personen som skal leie den sportslege satsinga til United, kan bli så kjensleladd knytt til eit resultat at du kan sette alt på spel. Men for United sin del håpar eg jo eigentleg at dette ikkje var ein United-manager som sa opp på direkten, uavhengig av om han er god nok og kva feil han har gjort undervegs.

– Skal eit mirakel til

Førre sesong enda klubben på ein 15. plass. Sidan Amorim overtok i november 2024 har han leia laget i 29 Premier League-kampar. Det har enda med sju sigrar, sju uavgjort og 15 tap.

Laurdag ventar Burnley på Old Trafford i Premier League. Manchester United står med eitt poeng på dei to første kampane, etter 0-1 tap heime mot Arsenal og 1-1 borte mot Fulham.

– Det blir ekstremt spennande å sjå kva som skjer i etterkant av kampen laurdag, seier Løkberg.

– Trur du Amorim er Manchester United-trenar etter den kommande landslagspausen?

– Ja, men ikkje om tre månader. Eg trur det rett og slett er ein «dead man walking». Ser ein på utviklinga som har vore sidan han tok over, så skal det omtrent eit mirakel til for at det her plutseleg snur. Signeringane i sommar har vore positive, men samtidig har dei eit gigantisk problem sentralt på midtbanen og målvaktplass, seier Løkberg.

Tjærnås meiner han bør få meir tid:

– Det vil vere feil å sparke han. Klubben har endra retning så ofte at dei ikkje bør gjere det igjen. Dei må stå ved han, la han forme innkjøpa han har ønskt, og sjå etter framgang. Einaste som kan endre på det i hovudet mitt er at han sjølv overfor eigarar og i garderoben er heilt open på at han ikkje fiksar dette. Da må dei sjølvsagt agere, men eg trur ikkje vi er der ennå.

Han får støtte av Langerød, som trur Amorim får meir tid:

– Viss Manchester United står utan manager etter fire kampar i ein ny sesong der dei har investert over 200 mill. pund på spelarar, så er det ei fallitterklæring for leiinga, trenaren, og kulturen overfor spelarane og alt, seier Langerød og legg til:

– Det er mange ting eg er usikker på. Men når ein har valt den vegen her, så synest eg det er eit eller anna som blir heilt riv, ruskande gale å finne ut at dette her er gale fire kampar ut i ein ny sesong.