Saksøkar i retten: – Det er eit levande mareritt

– Prosessen som me har blitt utsett for saknar vel eigentleg sidestykke i norsk eigedomshistorie.

Det seier Kolbjørn Selmer, styreleiar i dei tre selskapa som saksøker Trondheim kommune for 2,55 milliardar kroner.

I 2014 vedtok politikarane i Trondheim at område på familiegarden hans i Trondheim kunne byggast ut.

Men ti år seinare, etter mange diskusjonar og utgreiingar, snudde politikarane og verna området frå utbygging.

– Det er eit levande mareritt, for å seie det enkelt. Du gjer investeringar og brukar ressursar i tillit og samarbeid med ein kommune, seier Selmer.

Han forklarar seg i retten om korleis dei avvikla drifta på familiegarden på Overvik og utvikla eigedommen for bustadbygging.

– Så går det litt tid og så skal dei dra teppet under beina på deg når du har gjort både investeringar og tilrettelagd alt i samarbeidet som har vore.

– Så det har vore mildt sagt forferdeleg, legg han til.

– Det var aldri eit tema at det ikkje skulle byggast ut

Etter at politikarane vedtok at området på Overvik kunne brukast til bustadbygging i 2014, sette Selmer i gang å planlegge for utbygginga.

– Frå 2014 begynte me å bygge opp ein eigen organisasjon. Det var ein omfattande prosess, seier Selmer.

Han fortel at dei hadde mange møter med kommunen, for å samarbeide om prosjektet.

– Det var aldri eit tema at det ikkje skulle byggast ut.

Ikkje før politikarane vedtok i 2021 at det ikkje skal byggast ut på resten av området likevel snakka dei om at området ikkje skulle byggast ut, ifølge Selmer.

Det skjedde mellom anna etter at Stortinget vedtok ein ny nasjonal jordvernstrategi.

Og i 2024 vedtok politikarane at delar av området skulle førast tilbake til landbruksføremål.

Men saksøkarane meiner tilbakeføringa kom for langt ut i prosessen, etter det var områderegulert til bustadbygging, til at det er lovleg.

Kommuneadvokaten er ueinig og meiner at politikarane var i sin fulle rett til å snu.

– Lettare for Cæsar å snu

– Det var eit stort areal som i fleire rundar hadde blitt frådelt frå landbruksdrift til føremålet bustad.

Det seier Torbjørn Sotberg, administrerande direktør i bustadbyggelaget Tobb, i retten.

Selskapet er deleigar i selskapa som har saksøkt kommunen.

– Då er det ikkje berre å vende tilbake. Det var lettare for Cæsar å snu med troppen sin då han skulle til Roma, enn for oss å føre dette tilbake.

I retten har kommuneadvokaten påpeika at politikken er eit skiftande landskap og at avgjerder kan endre seg.

– Hadde de nokre tankar sjølv om det kostnadane de hadde og om det var ein risiko for at det ville bli forgjeves? spør dommar Kristin Rognan.

– Nei. Fordi diskusjonen om det internt var om korleis innhaldet i planen kom til å sjå ut, svarar Selmer.

– Det var aldri eit tema, før vedtaket av omreguleringa, at det ikkje skulle bli regulert, legg han til.

Brukte 688 millionar før spaden blei sett i jorda

Utbyggarselskapa har saksøkt kommunen for 2,55 milliardar kroner for tapte utgifter og tapt framtidig forteneste.

– Dei blir framstilte som dei er griske utbyggarar som krev dette, men her er det brukt betydelege beløp for at kommunen ville ha bustader som kommunen trong.

Det sa advokat Anders Flaatin Wilhelmsen som representerer saksøkarane, i retten tysdag.

Subsidiært ber dei om 688 millionar kroner, som er beløpet utbyggarane til no har brukt på planlegging og tilrettelegging for utbygginga.

– Det er profesjonelle utbyggarselskap som har brukt 688 millionar på eit prosjekt som dei hadde ein velgrunna forventning om at skulle bli gjennomført.

Advokaten seier det kan høyrest mykje ut å bruke så mykje pengar før spaden blir sett i jorda.

– Men det er enorme utgifter i eigedomsutvikling, legg han til.

I utgiftene ligg det etablering av infrastruktur, veg, kjøp av tomter og anna utvikling som skulle mogeleggjere utbygginga.

I tillegg krev dei erstatning for utgifter for sesongkort, VIP-billettar, rafting på Geilo, iskulp i garderobe, samt turar til Planica og Svolvær.

– Det er reelle kostnader. Me gjorde masse forskjellig i prosjektet og samarbeida med mange forskjellige organisasjonar, seier Selmer i retten onsdag.

Han forklarar mellom anna at turen til Planica var med eit bedriftsnettverk og at reisene handla om å hente inspirasjon, halde foredrag og utvikle prosjektet.

– Me var også ute og henta mykje inspirasjon. Vårt mål, saman med Trondheim kommune var at me skulle lage Noregs beste bydel.

Kommunen avviser kravet

– Det er eit grunnleggande demokratisk prinsipp at innbyggarane skal påverke retninga på arealutviklinga.

Det sa kommuneadvokat i Trondheim, Lars Marius Heggberget, i retten tysdag.

– Saksøkarane er grunnleggande ueinige i dei arealpolitiske vurderingane som både det førre og det noverande bystyret har tatt.

Heggberget seier avgjersla til politikarane bygger på grundige politiske prosessar og avvegingar.

Kommunen avviser fullt og heilt kravet frå utbyggarane.

– Arealpolitikk som all anna politikk, er dynamisk. Det ligg i korta at det kan endrast, legg kommuneadvokaten til.

Han står fast ved at ei områderegulering ikkje er juridisk bindande.