Rekordstor sluttavtale til kommunetopp vekker oppsikt

Denne veka banka kommunestyret i Sogndal gjennom sluttavtalen til kommunedirektør Tor-Einar Skinlo.

Den gir han 4,5 millionar kroner, oppreisingserstatning på om lag 200.000 kroner, dekka advokatutgifter, samt ein positiv sluttattest.

– Dette høyrest ut til å vere ein høg sluttavtale, seier Gudrun Haabeth Grindaker, dagleg leiar i Norsk Kommunedirektørforum.

Ho kjenner ikkje til høgare sluttavtaler for ein kommunedirektør i Noreg.

Ifølge Kommunal Rapport toppa truleg Porsgrunn fjorårets utbetaling. Kommunetopp Rose-Marie Christiansen har ein avtale som kostar nær 3,5 millionar kroner.

Éin million lågare enn avtalen i Sogndal.

Ifølge ei undersøking som PWC og Norsk rådmannsforum har gjort, så kostar det kommunane mellom 1 og 4 millionar kroner å avsette ein kommunedirektør.

Kommunar kjøper seg ut av konfliktar

Ifølge Norsk Kommunedirektørforum er konflikt årsaka til at det årleg blir skrivne 20–25 sluttavtaler i norske kommunar.

Med andre ord kostar det kommunane mellom 20–100 millionar kroner i året, og det berre i reine sluttavtalar.

Dagleg leiar Gudrun Haabeth Grindaker seier det har vore ein liten auke dei siste åra.

Dersom det er mykje konflikt i det politiske miljøet, vil det også påverke samspelet, politikk og administrasjon, fortel ho.

Dette syner både forsking og det dei sjølve har sett.

– Og når kommuneøkonomien er stram, slik den er no, så blir dei folkevalde stilt ovanfor tøffe prioriteringar.

– Det har kome reaksjonar på at sluttavtale i Sogndal er høg. Har du forståing for det?

– Dette er jo ein del av kommunen sine midlar som kunne blitt brukt til andre ting, men det er også viktig å ha med seg at også kommunedirektøren skal verte behandla med respekt, seier ho.

– Vil alltid ha ein pris å kvitte seg med toppleiarar

Morten Øgård, professor i offentleg administrasjon og leiing ved Universitetet i Agder, seier følgande om sluttpakken til Skinlo i Sogndal:

– Jo, 4,5 million kroner er mykje pengar, men om det er mykje for å kvitte seg med ein kommunedirektør, er eit anna spørsmål.

Han seier summen er opp til dei folkevalde å avgjere.

Øgård seier kommunale toppjobbar er attraktive, men at dei er krevjande og kan ha høg fallhøgde.

– Det vil derfor alltid ha ein pris å kvitte seg med administrativ toppleiar.

Advokat: – Summen reflekterer uretten

Bakgrunnen for sluttavtalen i Sogndal er ein langvarig strid mellom kommunedirektøren og ordføraren i Sogndal.

– Dette blei svindyrt, kommenterte kommunestyrerepresentant for Frp, Rita Navarsete etter møtet.

Men advokaten til kommunedirektør Skinlo, synest ikkje summen er for høg.

– Det er dette det kostar å presse ein kommunedirektør ut av stillinga utan nokon sakleg grunn, seier Tor Erik Heggøy.

– Avtalen reflekterer saka sin ekstraordinære karakter og den uretten som er gjort seg skuldig i mot Skinlo.

– Den økonomiske ramma må også sjåast i samanheng med at kommunen som arbeidsgjevar har innrømt skuld ved å betale oppreisningserstatning, seier han.

Folk på gata: – Stor skam

Blant folk på gata i Sogndal er det mange som synest heile saka er lei, og at det no er bra at den har kome til ein ende.

– Eg synest det er ei stor skam at dette har kome ut over heile landet og at folk i bygda har stilt seg slik dei har gjort, seier Tordis Randmo.

– Det har vore mykje trøbbel, usemje og mange unødvendige vonde tankar.

Randmo seier ho håper ting vil roe seg, men at det kanskje først ved neste kommunestyremøte vil lande heilt.

– Det trur eg heile bygda ønskjer, for det har vore flautt slik det har vore no.

Frøydis Hegnar synest saka er vanskeleg å kommentere.

– Sogndal er eit lite samfunn, så dette er veldig betent. Alle er litt involvert i det på den eine eller andre måten, eller kjenner nokon som er det. Eg håper dei greier å løyse dette på ein god måte, seier ho.