Putins kamerat på veg mot «tidenes» rekord: – Har ingen respekt for han

Den «umoglege» rekorden har stått i over 30 år og tilhøyrer legendariske Wayne Gretzky.

Gretzky, kanskje den mest kjente hockeyspelaren i historia, la opp i 1999 og stoppa på 894 mål, ein rekord som har stått sidan.

Hockeyekspert i Viaplay, Ole Eskild Dahlstrøm, er vakse opp med å sjå på Wayne Gretzky.

– Eg trudde aldri rekorden kom til å bli tatt, seier hockeyeksperten.

Men no skjer det.

Aleksandr Ovetsjkin har akkurat no dundra 892 puckar i mål, og den mest ikoniske rekorden til sporten får ny eigar.

– Alle russarar kjem til å vere stolte av det. Det er spesielt for oss å sjå han ta rekorden heim, seier Andrej Svetsjnikov ifølge Nhl.com.

– Ovetsjkin er bjøllesauen, han går først. Ishockey er rangert kanskje aller høgast i Russland. Og han er den som står på toppen av det. Det er ikkje noko å lure på, seier Dahlstrøm.

Ovetsjkin er éin av 60 russarar som spelar i NHL. Russland er utestengt frå VM og OL, men russiske spelarar får framleis spele i NHL.

– Mange har tatt avstand frå Putin etter at krigen braut ut. Nokre idrettsutøvarar forlét landet for å få konkurrere vidare innan idrettane sine, seier Inna Sangadzhieva i Den norske Helsingforskomité til NRK.

Valkamp med Putin

Aleksandr Ovetsjkin har fleire gonger hevda at han er ein idrettsutøvar, og ikkje har noko med politikk å gjere. I 2022, etter at Russland invaderte Ukraina, svarte han på fleire spørsmål om dette.

– Han (Putin) er presidenten min, men eg er ikkje ein del av politikken, eg er ein idrettsutøvar. Eg håpar alt er ferdig snart. Det er ein vanskeleg situasjon for begge sider, sa Ovetsjkin om krigen i Ukraina i 2022.

På den same pressekonferansen ytra han også eit ønske om fred i verda.

Samtidig var Ovetsjkins profilbilete på Instagram eit bilete av han saman med Vladimir Putin, eit profilbilde han framleis har.

Forholdet får fleire til å reagere, blant anna den svært meritterte NHL-målvakta Dominik Hasek. Han har no blitt 60 år, og kallar Ovetsjkins forhold til Putin den store elefanten i rommet.

– Russaren Ovetsjkin er akkurat no ein enorm reklameplakat for Russlands aggressive krigføring, seier Hasek til nettstaden DW.

I 2017 starta Ovetsjkin kampanjen «PutinTeam», som ein del av valkampen til presidenten. Sergej Karjakin og Aleksandr Legkov var blant dei andre idrettsstjernene i kampanjen.

Hasek begrip ikkje kvifor Ovetsjkin ikkje er kasta ut av NHL.

– Eg har ingen respekt for han og hans politiske syn, seier Hasek til DW.

– Eg synest det er rart at Ovetsjkin ikkje er på nokon sanksjonslister, sidan han er grunnleggaren av «Putin Team» og dermed er ein støttespelar til russisk propaganda og krigføring, seier Inna Sangadzhieva i Den norske Helsingforskomité til NRK.

Ein helt i Russland

Ei heil hockeyverd har følgt med på rekordjakta. Den har fått sitt eige namn: «The Gr8 chase», den store jakta, som også speler på Ovetsjkins draktnummer.

Ein spesiallaga grafikk dukkar opp kvar gong han skårar.

Dei russiske sportsredaksjonane følger jakta tett. I Moskva blir han dyrka som ei ekte stjerne.

– Kom igjen, Alex, står det på eit enormt reklameskilt ved ein av Moskvas motorvegar.