Politiet feilsende brev til om lag 1500 personar – personnummer på avvegar

– Me tar det veldig alvorleg.

Det seier Henrik Nielsen seniorrådgjevar i kommunikasjonsstaben hos Politidirektoratet, til NRK.

Om lag 1500 personar rundt om i landet fått feilsende brev i Digipost frå politiet.

Førebels veit dei ikkje noko om årsaka til feilsendinga, men at det har skjedd i fleire politidistrikt over heile landet.

– Kvar desse 1500 breva har gått ut er noko me må undersøke nærmare, seier Nielsen.

Det melder politidirektoratet i ei pressemelding.

– Personnummer på avvegar

Breva som er sendt ut gjeld i hovudsak bekreftingar på at nokon er meldt til politiet og orientering om saksavgjersler.

Dette betyr at breva kan innehalde sensitiv informasjon, som til dømes personnummer.

– Sensitiv informasjon er det uansett, fordi det betyr at personnummer er på avvegar.

Politiet veit ikkje noko om årsaka til at breva har blitt sendt ut til feil personar.

– Det me gjer vidare no er å finne ut av kva som er årsaka til dette. Det er viktig for oss.

Sidan personopplysingar er på avvegar vil Datatilsynet bli varsla.

– Me må samarbeide med Digitaliseringsdirektoratet vedrørande den elektroniske løysinga for utsending av slike brev. Og me må finne ut kven dette gjeld, legg Nielsen til.

Utsending av slike brev frå politiet skjer ein gong i døgnet. Neste utsending er no stoppa til direktoratet veit meir om årsaka til feilen.

Ber folk slette breva

Dersom du har fått eit brev frå politiet som ikkje er til deg er beskjeden frå Nielsen klar:

– Det som er viktig å seie, er at viss du får et slikt brev i din digitale postkasse, og det ikkje er til deg, og du ser at det ikkje er til deg, så slett det.

Breva kan innehalde informasjon om personar som er meldt til politiet, saker som er lagt bort og anna kommunikasjon politiet har med innbyggarane.

– Me må også finne ut av kva som er i desse om lag 1500 breva, seier Nielsen.