Politiet åtvarar mot svindelforsøk på epost

Politiet åtvarar mot fleire svindelforsøk på epost.

I epostane er det ein beskjed om at mottakaren har fått eit brev som ligg på Altinn.

Avsendaren gir seg ut for å vere Namsmannen, Politiet, Skatteetaten eller andre offentlege etatar, skriv politiet i ei pressemelding.

Politiet ber folk om å ikkje trykke på lenka i eposten.

– Svindlarar spelar ofte på følelsar som stress og frykt i sine svindelangrep. I dette tilfellet ser avsendar ut som betydelege samfunnsaktørar som befolkninga generelt har stor tillit til, seier einingsleiar Fredrik Lykken ved bedragerieininga i Økokrim.

– Vi registrerer ein auke i bedrageri, og omfanget er no så stort at det er eit samfunnsproblem. Svindlarane tilpassar seg heile tida nye svindelmetodar og det er viktig å ikkje vere naiv ved mottak av SMS eller epost, seier Lykken.