Opnar opp om kjendisgrep: – Noko som gjer meg glad

– Eg såg opp til mannlege Liverpool-spelarar. For det var det eg såg på TV-en.

Det seier ei ærleg Ingrid Syrstad Engen, som fortel at det ikkje var mange synlege kvinnelege fotballførebilde da ho sjølv var ung. Ho hugsar korleis ho sat framfor TV-en, fascinert av dei mannlege spelarane.

Nå er tonen ein heilt annan.

Landslagsstjerna er klar over at ho har blitt eit stort førebilde for mange unge, både på og utanfor fotballbanen.

– Eg håpar jo at unge jenter og gutar kan sjå opp til det eg gjer. Og vala eg tar, blir baserte på det, seier ho.

Målet til 26-åringen som bar kapteinsbindet da Noreg møtte Island førre veke, er nå å bli meir synleg og eit enda større førebilde for dei yngre.

Nå opnar ho opp om det svært uvanlege valet – for ein norsk fotballspelar å vere. Barcelona-profilen er nemleg ein del av eit kjendismanagement som skal hjelpe henne med å bygge profilen sin utanfor idrettsarenaen.

– Der får eg høve til å vise korleis eg er av banen òg. For min del gir det meg energi, og eg synest det er artig å kunne ta del i, seier Engen.

26-åringen er likevel klinkande klar på at fotballen er førsteprioritet.

– Ein komplett profil

– Ho er ikkje berre ein god fotballspelar, men ho er ein perfekt profil utanfor banen òg, med dei rette haldningane og verdiane. Ho er eit førebilde, rett og slett, seier manager David Eriksen.

Eriksen er for mange kjente frå TV-serien «Alle elskar David». Kjendismanageren representerer Ingrid Syrstad Engen utanfor fotballbanen og jobbar med å bygge profilen og merkevara hennar.

Engen har berre i underkant av tre månader igjen av kontrakten med Barcelona. Det at ho framleis er ein aktiv fotballspelar, byr på utfordringar.

– Ho speler til dagleg. Det er ikkje berre å ta henne ut og gjere kampanjar eller sette henne inn i eit TV-show for å bygge profilen hennar. Vi må forhalde oss til kvardagen hennar, som er å spele fotball. Og ta dei små lukene vi får innimellom, seier Eriksen til NRK.

Han seier at det er uvanleg at norske idrettsprofilar bruker slik type hjelp til å bygge opp sin eigen profil, men at det er heilt vanleg i utlandet.

– Om vi drar til England, Frankrike eller USA, så er det veldig vanleg. Vi er oppvaksne med at det gjerne er foreldre som er manager for son eller dotter si. Det er ikkje alltid like bra. Det kan fungere, men det er noko med å få nokre andre utanfrå til å sjå profilen og korleis dette kan byggast på rett måte, fortset han.

Ingrid Syrstad Engen var gjest i portrettserien «Dama til» på NRK. Sjå episoden her:

– Gjer meg glad

Syrstad Engen er ei sentral brikke på landslaget, og det store målet for året er EM-sluttspelet i sommar i Sveits.

Samtidig vil ho vise fram fotballkvardagen via sosiale medium, særleg for å inspirere dei yngre.

– Å kunne vise korleis det er for at unge skal kunne drøyme om det same, det er noko som er kjempeviktig.

I 0-0-kampen mot Island i Nasjonsligaen førre veke var det nettopp Syrstad Engen som fekk ansvaret for å vere kaptein. Landslagskollegaer og trenarar held ikkje igjen når dei blir spurde om Engen.

– Ho er ein fantastisk rollemodell for yngre jenter. Frå synspunktet mitt vil det alltid vere bra jo meir ho kan bruke plattformene sine til å spreie positivt innhald, seier landslagssjef Gemma Grainger.

– Det er noko som interesserer meg og noko som gjer meg glad, seier Engen.

Sjå Noreg – Frankrike på NRK 2 tysdag frå kl. 18:45