Nye bilete frå privat øy gjer unikt innblikk i livet til Jeffrey Epstein

Onsdag vart det offentleggjort nye bilete frå den private øya til Jeffrey Epstein.

Forretningsmannen hadde i fleire år ei høg stjerne, og var kjent som ein mann med mange og mektige vener. Det snudde då han i 2005 vart dømd til fengsel i 18 månader for å ha kjøpt seksuelle tenester frå mindreårige.

Han erkjente straffskuld for sexkjøp, men sa at han trudde jentene var myndige.

Seinare vart han òg tiltalt for menneskehandel av mindreårige, men erklærte seg ikkje skuldig.

Ein av stadene han vart skulda for å ha forgripe seg på unge jenter, var på ei privat øy i Karibia.

Dei nye bileta gir eit nytt innblikk i korleis livet kan ha vore på denne øya.

Det er dei demokratiske medlemmane av tilsynskomiteen som har offentleggjort bileta.

Styresmaktene på Dei amerikanske Jomfruøyene tok bileta i 2020, skriv The Guardian.

Det var året etter at Epstein vart funnen død i fengselet medan han venta på å verta stilt for retten for menneskehandel. Dødsfallet vart rekna som eit sjølvmord.

Epstein eigde to små øyer i Dei amerikanske Jomfruøyene i Karibia.

Ei av dei var Little St. James, som nokre lokale innbyggarar skal ha kalla «pedofili-øya», skriv The Guardian.

Mykje press om offentleggjering

Det har vore mykje press mot styresmaktene om å offentleggjera informasjon om Epstein-saka.

Kanskje spesielt på grunn av koplinga til ein veldig kjent person: president Donald Trump.

Òg tidlegare president Bill Clinton og tidlegare prins Andrew – som mista prinsetittelen – har vorte knytte til den overgrepsdømde forretningsmannen.

Det er ikkje kjent kor mange – eller kva type – dokument det amerikanske justisdepartementet har om Epstein-saka. Men over 30.000 sider har tidlegare vorte offentleggjorde.

Amerikanske styresmakter har òg tidlegare offentleggjort eit lydopptak med Ghislaine Maxwell, partnaren til Epstein. Ho vart i 2021 dømd til 20 års fengsel for medverking til overgrep.

Fleire trur at Epstein hadde ei liste over menn som hadde utført overgrep.

– Ei sånn liste har ikkje materialisert seg enno. Men det er gjerne ei slik type liste folk er på utkikk etter, har USA-ekspert Sofie Høgestøl tidlegare sagt til NRK.

Båe FBI og det amerikanske justisdepartementet avkrefta i sumar at ei slik liste finst.

Trump snudde

Donald Trump har heile tida nekta for å vita noko om dei seksuelle overgrepa og menneskehandelen som Epstein vart skulda eller dømd for.

I valkampen lova han å offentleggjera Epstein-dokumenta, men det endra seg etter at han vart president. Då prøvde han å få støttespelarane sine til å fokusera på andre ting, noko som ikkje fell i god jord hjå alle.

I november snudde Trump og sa at han ville be Republikanarane om å stemma for å offentleggjera dokumenta.

Båe Representantanes Hus og Senatet enda med å stemma for.